آرمی چیف کی فوج کو زینب کے قاتلوں کی گرفتاری میں مدد کی ہدایت

جنرل قمر جاوید باجوہ نے قصور میں معصوم زینب سے زیادتی اور بہیمانہ قتل کی مذمت کی فوٹو: فائل

---

آرمی چیف جنرل قمر جاوید باجوہ نے قصور میں قتل ہونے والی ننھی زینب کے قاتلوں کی فوری گرفتاری کے لیے سول انتظامیہ کے ساتھ مکمل تعاون کرنے کی ہدایت کردی۔

پاک فوج کے شعبہ تعلقات عامہ آئی ایس پی آر کے مطابق آرمی چیف جنرل قمر جاوید باجوہ نے قصور میں قتل ہونے والی ننھی زینب کے قاتلوں کی فوری گرفتاری کے لیے سول انتظامیہ کے ساتھ مکمل تعاون کرنے کی ہدایت کردی۔ پاک فوج کے ترجمان میجر جنرل آصف غفور نے ٹوئٹر پر جاری کردہ بیان میں بتایا کہ آرمی چیف نے قصور میں معصوم زینب سے زیادتی اور بہیمانہ قتل کی مذمت کی ہے۔

یہ بھی پڑھیں: احتجاج کرنے والوں پر پولیس فائرنگ سے 2 افراد جاں بحق

COAS condemns cold blooded murder of innocent Zainab. Responding to appeal by the aggrieved parents to COAS, directs immediate all out support to civil administration to arrest the criminals and bringing them to exemplary justice.

— DG ISPR (@OfficialDGISPR) January 10, 2018

آرمی چیف نے بچی کے غمزدہ والدین کی اپیل پر ردعمل دیتے ہوئے فوج کو مجرموں کی فی الفور گرفتاری اور انہیں قرار واقعی سزا دینے کے لیے سول انتظامیہ کے ساتھ مکمل تعاون کرنے کی ہدایت کردی۔ زینب کے والدین نے عمرے سے وطن واپس پہنچنے پر آرمی چیف سے مدد کی اپیل کی تھی۔

اس خبر کو بھی پڑھیں : قصور میں 8 سالہ بچی کا زیادتی کے بعد لرزہ خیز قتل

واضح رہے کہ قصور میں 8 سالہ بچی زینب کو 5 روز تک زیادتی کا نشانہ بنانے کے بعد قتل کردیا گیا جب کہ ملزمان نے بچی کی لاش کو کچرا کنڈی میں پھینک دیا۔ واقعے کے خلاف شہر میں ہنگامے پھوٹ پڑے اور پولیس کی مظاہرین پر فائرنگ سے 2 افراد جاں بحق اور متعدد زخمی ہوگئے۔