روس کی کراچی میں سنگل کنٹری نمائش لگانے میں دلچسپی

پاکستانی ایکسپورٹرز اورروسی بائنگ ہاؤسز میں روابط کیلیے مدد کی جائے، عابد جاوید اکبر فوٹو: فائل

---

روس نے کراچی میں روسی مصنوعات کی سنگل کنٹری نمائش کے انعقاد میں دلچسپی ظاہر کی ہے۔

روسی قونصل جنرل Andrey Demidov نے ٹریڈ ڈیولپمنٹ اتھارٹی کے چیف ایگزیکٹو عابد جاوید اکبر سے ملاقات میں دونوں ملکوں کے درمیان تجارت کے فروغ کے لیے دوطرفہ تعاون بڑھانے پر اتفاق کیا۔ اس موقع پر عابد جاوید اکبر نے روسی قونصل جنرل کوبتایا کہ ٹریڈ ڈیولپمنٹ اتھارٹی نے روس سے تجارتی روابط بڑھانے کی منصوبہ بندی کی ہے، پاکستانی کمپنیاں ٹریڈ ڈیولپمنٹ اتھارٹی کے ذریعے روس میں ٹیکسٹائل اور فوڈ سیکٹر کی 4 اہم تجارتی نمائشوں میں شرکت کررہی ہیں جس کے نتیجے میں روسی منڈی میں پاکستان کے لیے ان شعبوں میں گروتھ ہو رہی ہے۔



انہوں نے روسی قونصل جنرل سے پاکستانی ایکسپورٹرز اور روس کے بڑے بائنگ ہائوسز کے درمیان روابط استوار کرنے کے لیے قونصل خانے سے مدد کی درخواست کی۔ روسی قونصل جنرل نے کراچی ایکسپو سینٹر میں روسی مصنوعات کی نمائش کے انعقاد میں دلچسپی کا اظہار کیا جس پر عابد جاوید اکبر نے ہرممکن تعاون کی یقین دہانی کرائی۔ عابد جاوید اکبر نے روسی قونصل جنرل کو ایکسپو پاکستان 2013 میں شرکت کی دعوت دی۔