آج مینار پاکستان پرتبدیلی کابگل بج جائیگاعمران خان

لاہورمیں جوش و خروش ،قافلے رات کوہی آنے لگے،جلسہ گاہ میں ہزاروں کرسیاں لگ گئیں فوٹو: فائل

---

تحریک انصاف کے چیئرمین عمران خان نے کہا ہے کہ آج مینار پاکستان پرلاکھوں عوام کے سمندرسے تبدیلی کابگل بج جائے گا،ہماری سیاست کو بلبلہ کہنے والوں کیلیے آج کا جلسہ غیظ وغضب ثابت ہوگا،نئے پاکستان کی انتخابی مہم کیلیے آج2 ارب روپے سے سیاسی فنڈ ریزنگ کااعلان کروں گا۔

انھوں نے جمعرات کوصحافیوں کے اعزا ز میں ظہرانے کے موقع پرگفتگوکرتے ہوئے کہاکہ ن لیگ اور پیپلز پارٹی سمیت کوئی جماعت تحریک انصاف کا مقابلہ نہیں کر سکتی۔ مسئلہ کشمیرجنگ سے نہیںمذاکرات سے حل ہوگا،خارجہ پالیسی قومی امنگوں کے مطابق ہوگی، پارٹی منشور میں پہلے90 رو زکے پروگرام کا اعلان کروں گا۔



اقتدار میں آ کر صرف 18 رکنی کابینہ بنائیں گے۔عمران نے کہا کہ جماعت اسلامی، بہاول پورکی عباسی فیملی اورعوامی مسلم لیگ سے سیٹ ایڈجسٹمنٹ کیلیے گفتگو23مارچ کے بعدہو گی تاہم کسی حکومتی جماعت سے رابطہ نہیں کیا جائے گا۔

عوام ن لیگ اور پیپلز پارٹی کے پیشہ ورامیدواروں سے تنگ آچکے ہیں، میں نے درست کہاکہ آئندہ انتخابات پانی پت کی جنگ ہوں گے،جس میں ہم نے کرپٹ اور مفاد پرستوں کو شکست دے کر نئے پاکستان کی بنیاد رکھناہے۔ دوسری جانب لاہور میں آج تحریک انصاف کے جلسے کیلیے جوش و خروش عرو ج پر ہے ۔ شہر میں بینرز، اسکرینز اور پوسٹرز کے علاوہ تشہیری گاڑیوں کا بندوبست کیاگیاہے۔ پنڈال میں میڈیاکے علاوہ حاضرین کیلیے ہزاروں کرسیاں کا بندوبست کیا گیا ہے۔