کاجول اگلی فلم میں گلوکارہ کا کردار اداکریں گی

کاجول اپنے شوہر اجے دیو گن کی پروڈکشن میں بننے والی فلم ’’ایلا‘‘ میں مرکزی کردار ادا کریں گی

ویب ڈیسک January 19, 2018

’’وی آئی پی 2‘‘سے قبل کاجول طویل عرصے بعد بالی ووڈ کنگ شاہ رخ خان کے ساتھ فلم’’دل والے‘‘میں نظر آئی تھیں، فوٹوفائل

بالی ووڈ اداکارہ کاجول طویل عرصے بعد ایک بار پھر بڑی اسکرین پر نظر آئیں گی لیکن اس بار وہ پہلی بار ایک گلوکارہ کا کردار ادا کریں گی۔

کاجول کا شمار بالی ووڈ کی صف اول کی اداکاراؤں میں ہوتا ہے جو کم لیکن بہترین کام کرنا پسند کرتی ہیں، یہی وجہ ہے کہ ان کے چاہنے والے آج بھی انہیں اسکرین پر دیکھنے کے لیے بے چین رہتے ہیں۔ کاجول آخری بار گزشتہ برس ساؤتھ انڈین فلم''وی آئی پی2''میں نظر آئی تھیں۔ یہ فلم ساؤتھ انڈین سینما میں تو اچھی کارکردگی دکھانے میں کامیاب رہی تھی لیکن بالی ووڈ کے شائقین کو زیادہ متاثر نہ کرسکی تھی تاہم کاجول اب ایک بار پھر بڑی اسکرین پر اپنے جلوے بکھیرنے آرہی ہیں۔

اس خبرکوبھی پڑھیں: وہ فلمیں جنہیں ٹھکرا کرکاجول نے بڑی غلطی کی

بھارتی میڈیا کے مطابق اداکارہ کاجول بہت جلد اپنے شوہر اجے دیوگن کی پروڈکشن میں بننے والی فلم ''ایلا'' کی شوٹنگ کاآغاز کریں گی، فلم میں وہ پہلی بار ایک گلوکارہ کے روپ میں نظر آئیں گی۔ ''وی آئی پی 2'' سے قبل کاجول طویل عرصے بعد بالی ووڈ کنگ شاہ رخ خان کے ساتھ فلم''دل والے''میں نظر آئی تھیں۔ شاہ رخ خان کے ساتھ کام کرنے کے حوالے سے ایک انٹرویو کے دوران کاجول کا کہنا تھا کہ شاہ رخ کے ساتھ کام کرنے کا تجربہ ہمیشہ اچھا ہوتا ہے وہ بہت اچھے انسان ہیں۔ شاہ رخ خان کےساتھ کام کرنے میں اس لیے بھی مزہ آتا ہے کیو نکہ وہ اپنے کردار میں 300 فیصد ڈوب کر اداکاری کرتے ہیں۔