اکشے نے سنجے لیلا بھنسالی کی بات رکھ لی

اکشے کمار کی فلم ’پیڈمین‘ 9 فروری کو ریلیز کی جائے گی۔ فوٹو: فائل

---

بالی ووڈ کھلاڑی اکشے کمار نے ہدایت کار سنجے لیلا بھنسالی کی فلم 'پدومات' کی خاطر اپنی فلم 'پیڈمین' 26 جنوری کے بجائے 9 فروری کو ریلیز کرنے کا فیصلہ کیا ہے۔

بالی ووڈ کے ایکشن ہیرو اکشے کمار کی ' ٹوائلٹ ایک پریم کتھا ' کے بعد ایک اور سماجی موضوع پر بننے والی فلم 'پیڈمین' کا انتظار شائقین بے صبری سے کررہے ہیں جو رواں ماہ 26 جنوری کو ریلیز ہونا تھی جب کہ بھارت کی سب سے متنازع فلم 'پدماوت' بھی 25 جنوری کو ریلیز ہورہی ہے لیکن 2018 کے اس پہلے اور بڑے باکس آفس ٹکراؤ کو لے کر ہدایت کار سنجے لیلا بھنسالی بے حد پریشان تھے۔

اس خبر کو بھی پڑھیں؛ انتہا پسند ہندوؤں کی بھنسالی اور دپیکا کو زندہ دفن کرنے کی دھمکی

فلم 'پدماوت' پہلے ہی تنازعات کا شکار ہے اور کئی ریاستوں میں فلم کی ریلیز ایک اہم مسئلہ بن چکی ہے ایسے میں ہدایت کارسنجے لیلا بھنسالی اکشے کمار کی فلم کے ساتھ ٹکراؤ نہیں چاہتے تھے اوراپنی فلم فروری میں ریلیز کرنا چاہتے تھے مگر بھارتی سینسر بورڈ کی جانب سے فلم کو 25 جنوری کو ریلیز کے اعلان کے بعد وہ کچھ نہ کرسکے، لہذا انہوں نے مختلف ذرائع سے فلم 'پیڈمین' کی ریلیز کو آگے بڑھانے کی کوشش کی جس میں وہ بالآخر کامیاب ہوگئے ہیں۔

#BreakingNews: #PadMan postponed... Shifted to 9 Feb 2018.

— taran adarsh (@taran_adarsh) January 19, 2018

بھارت کے فلمی تجزیہ کار ترن ادارش نے سماجی رابطے کی ویب سائٹ پر بریکنگ نیوز دی کہ اکشے کمار نے 26 جنوری کو اپنی فلم 'پیڈمین' کی نمائش ملتوی کردی جو اب 9 فروری کو ریلیز کی جائے گی۔

واضح رہے آر بالکی کی ہدایت کاری میں بننے والی فلم 'پیڈمین' میں بالی ووڈ کے کھلاڑی کے ساتھ سونم کپور اور رادھکا آپٹے مرکزی کردار میں دکھائی دیں گے۔