کراچی میں مسافر بس اور ٹرک میں تصادم سے 5 افراد جاں بحق

حادثے میں 10 سے زائد افراد زخمی بھی ہوئے جن میں خواتین اور بچے شامل ہیں، ریسکیو ذرائع .۔ فوٹو: فائل

---

شہر قائد کے علاقے ناردرن بائی پاس پر بس اور ٹرک کے درمیان تصادم کے نتیجے میں 5 افراد جاں بحق اور 10 سے زائد زخمی ہوگئے۔

ایکسپریس نیوز کے مطابق کراچی کے علاقے ناردرن بائی پاس کے قریب بس اور ٹرک میں تصادم ہوگیا جس کے نتیجے میں 5 افراد جاں بحق جب کہ 10 سے زائد زخمی ہوگئے جس میں خواتین اور بچے بھی شامل ہیں۔

حادثے کی اطلاع ملتے ہی ریسکیو ٹیمیں موقع پر پہنچ گئیں اور امدادی کارروائیاں کرتے ہوئے لاشوں اور زخمیوں کو عباسی شہید اسپتال منتقل کردیا جہاں زخمیوں کو طبی امداد فراہم کی جارہی ہے جب کہ بعض زخمیوں کی حالت تشویش ناک بتائی جارہی ہے جس کے باعث اموات میں اضافے کا خدشہ ظاہرکیا جارہا ہے۔

پولیس کا کہنا ہے کہ حادثے کی وجہ نہیں معلوم ہوسکی تاہم تمام زاویوں سے تحقیقات کا آغاز کردیا ہے۔