بھارت کو بھی لیستھ ملنگا مل گیا

بھارت میں ایسا بولر سامنے آیا ہے جس کا ایکشن ٹی ٹوئنٹی اسپیشلسٹ اور متنازع ایکشن کے حامل فاسٹ بولر لیستھ ملنگا سے ملتا ہے۔

دنیا میں بہت کم ایسے بولر ہیں جو بہت مختصر عرصے کرکٹ کی پہچان بن جاتے ہیں اور ایسا ہی کچھ ہوا سری لنکا کے فاسٹ بولر لسیتھ ملنگا کے ساتھ جنہوں نے ڈیبیو کرتے ہی دنیا کو اپنا گرویدہ کرلیا۔

لیستھ ملگنا کو کارکردگی کے بجائے متنازع ایکشن کی وجہ سے زیادہ شہرت ملی لیکن کچھ عرصے میں انہوں نے اپنی لائن و لینتھ اور یارکر سے بلے بازوں کو ایسا پریشان کیا کہ ان کا شمار ٹی ٹوئنٹی کے اسپیشلسٹ بولرز میں ہونے لگا جس کی وجہ سے انہیں مختلف ٹی ٹوئنٹی لیگز میں مہنگے داموں خریدا جانے لگا، اور اس سے ان کی شہرت میں مزید اضافہ ہوا لیکن اب بھارت میں بھی ایک ایسا ہی بولر سامنے آیا ہے۔

بھارت کے سابق کھلاڑی آکاش چوپڑا نے سماجی رابطے کی ویب سائٹ ٹوئٹر پر بھارت کے ایک مقامی میچ 'مشتاق علی ٹرافی' کی ویڈیو اپ لوڈ کی اور اپنی ٹوئٹ میں انہوں نے کہا کہ ملیے بھارتی لیستھ ملنگا سے،

ویڈیو میں تامل ناڈو سے تعلق رکھنے والے بولر اتھی یاسایاراج کو گیند کرواتے دیکھا جاسکتا ہے جس میں ان کا ایکشن بالکل سری لنکا کے فاسٹ بولر لیستھ ملگنا سے ملتا ہے جب کہ ان کی لائن اور لینتھ اور یارکر بھی سری لنکن بالر جیسی ہے۔