تجارتی پالیسی 201823 جون سے پہلے متعارف کرادی جائے گی

5سالہ پالیسی میں پاک چین ایف ٹی اے میں ترامیم اور انڈونیشی ٹریڈایگریمنٹ پرتوجہ دی جائیگی،سیکریٹری ٹی ڈیپ

APP January 26, 2018

برآمدات کوفروغ دینے کیلیے 16 ملکوں کے گروپ پر کام ہورہا ہے، پالیسی پرلاہور میں مشاورتی سیشن کے بعدمیڈیاسے گفتگو۔ فوٹو: فائل

قومی تجارتی پالیسی 2018-23 تمام اسٹیک ہولڈرز سے مشاورت کے بعد تیار کی جائیگی اور جون 2018 سے پہلے نافذ کر دی جائے گی۔

سیکریٹری ٹریڈ ڈیولپمنٹ اتھارٹی آف پاکستان (ٹی ڈی اے پی) انعام اللہ دھاریجو نے اسٹریٹجک ٹریڈ پالیسی فریم ورک (ایس ٹی پی ایف) پرمشاورتی سیشن کے موقع پر میڈیا سے بات چیت میں کہاکہ پالیسی میں آزاد تجارتی معاہدے پر تھائی لینڈ اور ترکی کے ساتھ مذاکرات، پاکستان چین آزادتجارتی معاہدے مین ترامیم اور انڈونیشی تجارتی معاہدے پر توجہ دی جائے گی، جی ایس پی پلس اسکیم بین الاقوامی منڈیوں تک پاکستانی مصنوعات کی رسائی کے لیے معاون ثابت ہو گی۔ انھوں نے کہاکہ وزارت ان 16 ملکوں کے گروپ پر کام کر رہی ہے جہاں پاکستانی مصنوعات برآمد کی جاسکتی ہیں۔

قبل ازیں مشاورتی سیشن سے خطاب میں انھوں نے کہاکہ حکومت ایس ٹی پی ایف2018-23 میں کاروباری برادری کی تجاویز شامل کرنے کے ذریعے برآمدات کے پائیدار بنیادوں پر فروغ کے لیے درمیانی مدتی تجارتی پالیسی فریم ورک بنانے کی کوشش کر رہی ہے ، سیکریٹری تجارت یونس ڈھاگا کی ہدایت پر نئی تجارتی پالیسی میں بنیادی تبدیلیاں لانے کے مقصد سے ٹریڈ باڈیز کی رائے جانچنے کے لیے ملک بھر میں مشاورتی سیشنز کیے جا رہے ہیں۔

سیکریٹری ٹی ڈی اے پی نے امید ظاہر کی کہ ٹھوس اقدامات ملکی برآمدی شعبے کی ترقی کو مستحکم بنانے میںمعاون ثابت ہوںگے۔ انھوں نے برآمدات کو فروغ اور متنوع بنانے سے متعلق حکومتی اقدامات پر روشنی ڈالتے ہوئے کاروباری برادری کو برآمدات میں کمی روکنے کے لیے پیش کردہ وزیراعظم کے 180ارب روپے کے برآمدی پیکیج کے ساتھ غیرروایتی منڈیوں کے لیے 2 فیصد اضافی ڈیوٹی ڈرابیک کی فراہمی سے آگاہ کیا۔

انھوں نے کہاکہ ایکسپوپاکستان کے دسویں ایڈیشن کی کامیابی سے ابھرتے پاکستان کے مستقبل کا امیج ابھرا، نمائش میں 70 ملکوں کے 800 سے زائد خریداروں اور درآمدکنندگان نے شرکت کی، 'لک افریقہ' کانفرنس کا انعقاد غیرروایتی منڈیوں کو برآمدات کے فروغ کی جانب ایک اور پیشرفت تھی۔

قبل ازیں ڈائریکٹر جنرل ٹریڈ پالیسی وزارت تجارت نعمان اسلم نے تعارفی پریزنٹیشن پیش کی۔ ڈائریکٹر جنرل ٹی ڈی اے پی لاہور میاں ریاض احمد نے دیگر اعلیٰ افسران کے ساتھ اس سرگرمی کو کوآرڈینیٹ کیا۔

اس موقع پر صدر لاہور چیمبرآف کامرس اینڈ انڈسٹری ملک طاہر جاوید اور نائب صدر ایف پی سی سی آئی نے بھی خطاب کیا، ایل سی سی آئی، ویمن چیمرلاہور اور ملتان ڈویژن، پاک چائنا جوائنٹ چیمبرآف کامرس اینڈ انڈسٹری، ایف پی سی سی آئی لاہور، پاپام، پاکستان ٹینرز ایسوسی ایشن، اپٹما، پاکستان افغانستان جوائنٹ چیمبرآف کامرس اینڈ انڈسٹری، رائس ایکسپورٹرز ایسوسی ایشن، پاکستان اتھانول مینوفیکچررز ایسوسی ایشن اور پاکستان پولٹری ایسوسی ایشن کے نمائندوں نے بھی سیشن میں شرکت کی، سرگرمی 2 تکنیکی سیشنز پر مشتمل تھی، شرکا نے ٹریڈ پالیسی کی تیاری سے متعلق تجاویز اور آرا کے اظہار کا موقع دینے پر حکومت کا شکریہ ادا کیا۔