الیکشن کمیشن نے سندھ اور پنجاب کے الیکشن کمشنرزتبدیل کر دیئے

کراچی میں حلقوں کی حد بندیوں اور انتخابی فہرستوں کی تصدیق کا کام سر انجام دینے کے لئے محبوب انور کا تبادلہ سندھ میں کیا گیا تھا۔ فوٹو: فائل

---

الیکشن کمیشن آف پاکستان نے سندھ اور پنجاب کے الیکشن کمشنرز کو تبدیل کردیا ہے۔

ایکسپریس نیوز کے نمائندے محمد بلال کے مطابق الیکشن کمیش نے سندھ کے الیکشن کمشنر محبوب انور کو پنجاب اورپنجاب کے الیکشن کمشنر طارق قادری کو سندھ میں الیکشن کمشنر تعینات کرنے کا فیصلہ کیا ہے۔

نمائندے کا کہنا تھا کہ کراچی میں حلقوں کی حد بندیوں اور انتخابی فہرستوں کی تصدیق کا کام سر انجام دینے کے لئے محبوب انور کا تبادلہ پنجاب سے سندھ کر دیا گیا تھا کیوں کہ ان کا تعلق سندھ سے تھا اوروہ یہ کام احسن طریقے سے انجام دے سکتے تھے،اب جب کہ کراچی میں ووٹرز کی تصدیق اورحلقہ بندیوں کا کام مکمل ہوچکا ہے تو ان کا تبادلہ ایک بار پھر پنجاب کردیا گیا ہے۔

واضح رہے کہ سونو خان بلوچ جو اس وقت خیبر پختونخوا میں الیکشن کمشنر تعینات ہیں اس سے قبل سندھ کے الیکشن کمشنرکے عہدے پر تعینات تھے لیکن کراچی میں حلقوں کی حد بندیوں کا کام شروع کرنے سے قبل مختلف سیاسی جماعتوں کی جانب سے ان پر اعتراضات کے بعد الیکشن کمیشن نے محبوب انور کو ان کی جگہ سندھ کا الیکشن کمشنر تعینات کردیا تھا۔