سابق ٹیسٹ کرکٹرسعید انور کے بہنوئی لاہور سے اغوا

پولیس نے تاحال واقعے کا مقدمہ درج نہیں کیا،فوٹو:اسکرین گریب

---

سابق ٹیسٹ کرکٹر سعید انور کے بہنوئی کو ان کے گھر سے اغوا کرلیا گیا۔

ایکسپریس نیوز کے مطابق قومی کرکٹ ٹیم کے سابق بیٹسمین سعید انور کے بہنوئی اسد منیر کوجنوبی چھاؤنی کے علاقے میں واقع ان کے گھر سے اغوا کرلیا گیا ۔ سعید انور کی ہمشیرہ نے شوہر کے اغوا سے متعلق مقامی تھانے میں درخواست دے دی تاہم فی الحال مقدمہ درج نہیں کیا گیا۔

درخواست میں واقعے کی تفصیل بتاتے ہوئے کہا گیا ہے کہ 9 روز قبل سادہ لباس اہلکار اسدمنیر کوشناخت کرنے کے بعد سرکاری گاڑیوں میں بٹھا کر ساتھ لے گئے جب کہ نقاب پوش اہلکاروں نے اسدمنیر کا لیپ ٹاپ اور دیگر سامان بھی قبضے میں لے لیا۔ 9 روز گزرنے کے باوجود اسد منیر گھر نہیں لوٹے اور نہ ہی کوئی ٹیلی فونک رابطہ ہوا۔

سعید انور کی بہن کا کہنا تھا کہ واقعے کی تحریری درخواست دینے کے باوجود پولیس نے مقدمہ درج نہیں کیا جب کہ پولیس کا کہنا ہے کہ تحریری شکایت کی روشنی میں ابتدائی تفیش شروع کردی گئی ہے۔