بھارت سے شکست پر پاکستانی جونیئر کھلاڑی مایوسی میں ڈوب گئے

سیمی فائنل میں اس طرح کی ہار مقدر بنے گی کبھی نہ سوچا تھا، جونیئرز

عبدالرحمان رضا February 01, 2018

شاہین آفریدی نے وسیم اکرم کے نقش قدم پر چلنے کی خواہش ظاہر کردی۔ فوٹو : اے ایف پی

انڈر 19 ورلڈ کپ میں بھارت سے شکست کے بعد پاکستانی کھلاڑی مایوسی میں ڈوب گئے۔

بھارت سے سیمی فائنل ہارنے کے بعد پاکستانی ٹیم افغانستان سے تیسری پوزیشن کا میچ کھیلنے کیلیے کوئنز ٹاؤن پہنچ گئی،پلیئرز اس موقع پر مایوسی کا شکار نظر آئے۔

پلیئرز کا کہنا تھا کہ آسٹریلیا اور بعد ازاں میزبان نیوزی لینڈ کیخلاف سیریز میں بھی بہتر کھیل پیش کیا، ورلڈکپ سیمی فائنل تک بھی ٹیم کا سفر بہت اچھا رہا، کوچ کی بھرپور حوصلہ افزائی بھی حاصل رہی لیکن کبھی سوچا نہیں تھا کہ سیمی فائنل میں اس طرح کی ہار مقدر بنے گی۔

جونیئرز کا کہنا تھا کہ بہترین بولنگ کرنے کی کوشش کی لیکن فیلڈنگ میں مسائل کے سبب بھارتی ٹیم کو 200رنز تک محدود کرنے کا موقع گنوا دیا، جبکہ بیٹنگ میں بھی اپنی صلاحیتوں کا صحیح استعمال نہیں کرپائے۔

اس موقع پر فاسٹ بولر شاہین شاہ آفریدی نے کہا کہ جب آسٹریلیا میں تھے تو وسیم اکرم بھائی نے ہماری بھر پور رہنمائی کی، سابق کپتان میرے آئیڈیل ہیں، ان جیسا اسٹار بن کر ملک کی خدمت کرنا چاہتا ہوں۔

ایک سوال پر پیسر نے کہا کہ نیوزی لینڈ میں ہی سیریز کھیلنے والی سینئر ٹیم سے ملاقات ہوئی نہ ہی ان کی جانب سے کوئی حوصلہ افزائی کیلیے آیا۔

پیسر سے پوچھا گیا کہ لوگ ایک اور آفریدی کے ٹیم میں آنے کی بات کرتے ہیں تو انھوں نے جواب دیا کہ اچھا لگتا ہے لیکن شاہد آفریدی بہت بڑے اسٹار ہیں۔