کراچی میں صوبائی وزیر میر ہزار خان بجارانی اور اہلیہ کی لاشیں گھر سے برآمد

پولیس نے میر ہزار خان بجارانی کے دوملازمین کو حراست میں لے لیا

ویب ڈیسک February 01, 2018

میر ہزار خان بجارانی کی اہلیہ فریحہ رزاق رکن سندھ اسمبلی رہ چکی ہیں فوٹو: فیس بک فریحہ رزاق

صوبائی وزیر اور پیپلز پارٹی کے رہنما میر ہزار خان بجارانی اور ان کی اہلیہ کی لاشیں ڈیفنس میں واقع ان کی رہائش گاہ سے ملی ہیں۔

ایکسپریس نیوز کے مطابق صوبائی وزیر میر ہزار خان بجارانی اور ان کی اہلیہ کی لاشیں ڈیفنس میں واقع ان کی رہائش گاہ سے ملی ہیں۔ صوبائی وزیر کے پرائیوٹ سیکریٹری اللہ ورایو نے تصدیق کی ہے کہ میر ہزار خان بجارانی مردہ حالت میں پائے گئے ہیں۔ کمشنر کراچی نے ایکسپریس نیوز سے خصوصی گفتگو کرتے ہوئے بتایا کہ صوبائی وزیر کے بنگلے میں فائرنگ کی آواز سنی جس پر علاقے میں خوف و ہراس پھیل گیا اور پڑوسی باہر نکل آئے۔

میر ہزار خان بجارانی کے ملازمین نے ان کے کمرے میں جاکر دیکھا تو اندر صوبائی وزیر اور ان کی اہلیہ کی لاشیں پڑی تھی۔ ملازمین نے فورا ہزار خان بجارانی کے بیٹے کو اطلاع دی جس پر لواحقین موقع پر پہنچے اور لاشوں کو دیکھنے کے بعد پولیس کو اطلاع دی۔

پولیس نے واقعے کی ابتدائی تفتیش مکمل کرلی ہے اور میر ہزار خان بجارانی کے دوملازمین کو حراست میں لے لیا ہے، اس حوالے سے انچارج سی ٹی ڈی راجہ عمر خطاب نے میڈیا کو بتایا ہے کہ میرہزارخان بجارانی اور اہلیہ کی لاشیں بیڈروم سے متصل اسٹڈی روم سے ملی ہیں، اسی کمرے سے 30 بور کا پستول بھی ملا ہے، میر ہزار خان بجارانی کی کنپٹی پر گولی کا نشان ہے جب کہ موقع سے تین گولیاں بھی ملی ہیں جو مس فائر ہوئیں۔

صوبائی وزیر برائے صنعت و تجارت منظور وسان نے میڈیا سے گفتگو کرتے ہوئے کہا کہ واقعہ قتل ہے یا خودکشی اس کا فیصلہ تحقیقات سے ہوگا، وہ کل کابینہ میں میرے ساتھ تھے اور بہت خوشگوار موڈ میں تھے، ہمارے درمیان ہنسی مذاق بھی ہورہا تھا، ایسا آدمی خودکشی کر ہی نہیں سکتا۔

میر ہزار خان بجارانی کا تعلق کرم پور تعلقہ تنگوانی ضلع کشمور کندھ کوٹ سے تھا۔ مرحوم پی ایس 16 جیکب آباد سے رکن سندھ اسمبلی منتخب ہوئے تھے اور سندھ کے وزیر پلاننگ اینڈ ڈیولپمنٹ تھے۔ میر ہزار خان بجارانی وزیر تعلیم اور وزیر صنعت و پیداوار بھی رہ چکے ہیں۔ میر ہزار خان بجارانی 1947 میں پیدا ہوئے اور انہوں نے لواحقین میں ایک بیوہ، 3 بیٹے اور 2 بیٹیاں چھوڑی ہیں۔ میر ہزار خان بجارانی کی اہلیہ فریحہ رزاق بھی 2002 سے 2007 تک خواتین کی مخصوص نشست پر رکن سندھ اسمبلی رہ چکی ہیں۔

پیپلز پارٹی کے چیرمین بلاول بھٹو زرداری، شریک چیرمین آصف زرداری، ان کی بیٹی آصفہ بھٹو زرداری نے واقعے پر گہرے دکھ اور افسوس کا اظہار کرتے ہوئے کہا ہے کہ صدمے کی اس گھڑی میں سوگوار خاندان کے ساتھ ہیں، میر ہزار خان بجارانی اور ان کی اہلیہ کی ناگہانی موت کی افسوسناک خبر دل دہلا دینے والی ہے۔ بلاول بھٹو نے وزیراعلی سندھ مراد علی شاہ کو معاملے کی تحقیقات کر کے فوری رپورٹ دینے کا حکم دیا۔ آصف زرداری نے حکومت سندھ پر زور دیا کہ واقعے کی مکمل تحقیقات کی جائیں۔

چیرمین سینیٹ رضاربانی، اے این پی سندھ کے صدر شاہی سید، سینئر سیاست دان لیاقت جتوئی، چیئرمین پی ایس پی سید مصطفی کمال، وزیر اعلیٰ پنجاب شہباز شریف سمیت مختلف سیاسی و سماجی رہنماؤں نے میر ہزار خان بجارانی اور ان کی اہلیہ کی موت پر رنج کا اظہار کرتے ہوئے لواحقین سے تعزیت کی ہے۔

وزیر اعلیٰ پنجاب شہاز شریف نے ٹوئٹر پر ایک ٹوئٹ میں کہا ہے کہ میر ہزار خان بجارانی اور ان کی بیوی کی اچانک ہلاکت کا سن کر حیرانی ہوئی، اللہ تعالیٰ سے دعا ہے کہ وہ مرحوم کو جوار رحمت میں جگہ دے۔

Deeply shocked to learn about the murder of veteran PPP politician Mir Hazar Khan Bijrani & his wife! May Allah rest their souls in eternal peace & give patience to the bereaved family & friends...
— Shehbaz Sharif (@CMShehbaz) February 1, 2018

تحریک انصاف کے رہنما ڈاکٹر عارف علوی نے میں کہا کہ ان کے دوست میر ہزار خان بجارانی اور فریحہ رزاق کی ہلاکت کے بارے میں سن کر بہت افسوس ہوا۔

Very sad to hear about my friends Mir Hazar Khan Bijarani and Fariha Razzaq Haroon shot dead. May their souls rest in peace. Met him on Monday last & Fariha came over for lunch to my house on Saturday
— Dr. Arif Alvi (@ArifAlvi) February 1, 2018

دریں اثنا دونوں لاشوں کا پوسٹ مارٹم کرلیا گیا ہے اس حوالے سے جناح اسپتال شعبہ حادثات کی سربراہ سیمی جمالی نے کہا ہے کہ میر ہزار خان بجارانی اور ان کی اہلیہ کو مردہ حالت میں جناح اسپتال لایا گیا تھا، میر ہزار خان بجارانی کے سر میں ایک گولی لگی ہے جب کہ فریحہ کے سر، پیٹ اور ٹانگ پر ایک ایک گولی کا نشان ہے، لاشوں کے ایکس رے، سی ٹی اسکین اور دیگر ٹیسٹ کرلیے گئے ہیں جلد مزید معلومات سامنے آجائیں گی۔