تائیوان میں زلزلے سے 4 افراد ہلاک اور 225 زخمی

زلزلے سے 145 افراد لاپتہ ہوگئے جن میں سے زیادہ تر ملبے تلے دبے ہیں

ویب ڈیسک February 07, 2018

زلزلے سے 4 عمارتیں منہدم ہوگئیں، متعدد گھروں کو نقصان پہنچا اور سڑکیں ٹوٹ پھوٹ کا شکار ہوگئیں۔ فوٹو ٹیلی گراف

تائیوان میں 6.4 شدت کے زلزلے کے نتیجے میں 4 افراد ہلاک اور 225 زخمی ہوگئے جبکہ 145 سے زائد لاپتہ ہیں۔

غیر ملکی خبر رساں ادارے کے مطابق تائیوان کے شہر ووالین میں زلزلے کے باعث 4 افراد ہلاک اور 225 زخمی ہوگئے جبکہ 145 سے زائد لاپتہ ہوگئے ہیں۔ زیادہ تر لاپتہ افراد منہدم عمارتوں اور مکانوں کے ملبے کے نیچے دبے ہیں جنہیں نکالنے کے لیے امدادی کارروائیاں کی جارہی ہیں۔

زخمیوں میں سے بعض کی حالت نازک ہے جس کے باعث ہلاکتوں میں اضافے کا خدشہ ہے۔ زلزلے سے 4 عمارتیں منہدم ہوگئی ہیں جبکہ متعدد گھروں کو بھی نقصان پہنچا اور سڑکیں ٹوٹ پھوٹ کا شکار ہوگئی ہیں۔

https://twitter.com/maruchan____2/status/960918095081521152

زلزلہ پیما مرکز کا کہنا ہے کہ ریکٹر اسکیل پر زلزلے کی شدت 6.4 ریکارڈ کی گئی جب کہ زلزلہ مقامی وقت کے مطابق رات 11 بج کر 50 منٹ پر آیا۔ امدادی ذرائع کا کہنا ہے کہ زلزلے سے ایک ہوٹل کی عمارت مکمل طور پر تباہ ہوگئی جس کے نتیجے میں 17 سے زائد لوگ اس کے ملبے تلے پھنس گئے ہیں۔

واضح رہے کہ تائیوان میں دو سال قبل بھی شدید زلزلہ آیا تھا جس میں 117 افراد ہلاک ہوگئے تھے۔