سینیٹ انتخابات کیلئے کاغذات نامزدگی جمع کرانے کا آج آخری دن

ایم کیو ایم پاکستان نے تاحال سینیٹ کے لئے اپنے امیدواروں کے کاغذات نامزدگی جمع نہیں کرائے۔ فوٹو:فائل

---

سینیٹ انتخابات کیلئے کاغذات نامزدگی جمع کرانے کا آج آخری دن ہے۔

ایکسپریس نیوز کے مطابق سینیٹ انتخابات کیلئے کاغذات نامزدگی جمع کرانے کا آج آخری دن ہے اور الیکشن کمیشن کا کہنا ہے کہ کاغذات نامزدگی آج شام 4 بجے تک جمع کرائے جاسکتے ہیں۔ 7 جنرل، 2 ٹینکو کریٹ، 2 خواتین اور اقلیت کی 1 نشست پر کاغذات نامزدگی جمع کرانے کا سلسلہ آج بھی جاری رہے گا۔ سینیٹ الیکشن کیلئے پولنگ 3مارچ کو سندھ اسمبلی بلڈنگ میں ہوگی۔

یہ بھی پڑھیں: ایم کیوایم رابطہ کمیٹی نے سینیٹ کے لئے امیدواروں کا اعلان کردیا

الیکشن کمیشن کے مطابق سندھ میں سینیٹ کی 12 نشستوں کیلئے اب تک 23 کاغذات نامزدگی موصول ہوچکے ہیں۔ پیپلزپارٹی، پاک سرزمین پارٹی (پی ایس پی) اور مسلم لیگ ف کی جانب سے کاغذات جمع کرائے گئے ہیں۔ پاکستان پیپلزپارٹی نے 20، پی ایس پی نے 2 اور مسلم لیگ ف نے ایک نامزدگی فارم جمع کرایا ہے۔ پی ایس پی کی جانب سے آج مزید امیدواروں کے کاغذاتِ نامزدگی جمع کروائے جائیں گے۔

ایم کیو ایم پاکستان کی جانب سے تاحال سینیٹ کے لئے امیدواروں کے ناموں کو فائنل نہیں کیا جاسکا اور ایم کیو ایم پاکستان کامران ٹیسوری کو سینیٹ کا سیٹ دینے پر اختلافات کا شکار ہے۔ ذرائع کے مطابق فاروق ستار کی جانب سے 5 امیدواروں کے کاغذاتِ نامزدگی جمع کرائے جاسکتے ہیں جن میں احمد چنائے، خواجہ سہیل منصور، انصار نقوی، فرحان چشتی اور نگہت مرزا شامل ہیں۔

دوسری طرف ایم کیوایم پاکستان کی رابطہ کمیٹی نے سینیٹ کے لئے اپنے امیدواروں کے ناموں کا اعلان کردیا ہے جن میں فروغ نسیم، نسرین جلیل، امین الحق، شبیر قائم خانی، کشور زہرہ، عامر چشتی، سنجے پروانی اور عبد القادر خان شامل ہیں۔