قومی ریجنز ون ڈے کپ فواد عالم نے کراچی وائٹس کو ٹائٹل جتوا دیا

اسلام آباد کو 5وکٹ سے مات ، 348 رنز کا ہدف 5 وکٹ پر حاصل کیا۔ فوٹو: فائل

---

قومی ون ڈے ریجنز کپ کا ٹائٹل کراچی وائٹس نے اپنے نام کرلیا جب کہ فواد عالم فیصلہ کن میچ کے ہیرو رہے۔

قومی ون ڈے ریجنز کپ کراچی وائٹس کے چیمپئن بننے کے ساتھ اختتام پذیر ہوگیا ہے، فائنل میں اسلام آباد کو5 وکٹوں سے ناکامی کا سامنا کرنا پڑا، پنڈی کرکٹ اسٹیڈیم راولپنڈی میں ہونے والے اس میچ میں اسلام آباد نے بابر اعظم، شاہد یوسف اور شان مسعود کی عمدہ بیٹنگ کی بدولت 4 وکٹوں پر347 کا مجموعہ تشکیل دیا۔

شان مسعود اور عابد علی نے اسلام آباد کو 83 رنز کا اچھا آغاز فراہم کیا، شان مسعود 51 رنز بناکر پویلین لوٹ گئے، اسد شفیق نے انھیں آؤٹ کیا، 103 رنز پر عابد علی بھی37 رنز بنا کر ضیا الحق کی گیند پر محمد حسن کو کیچ دے بیٹھے۔ 153 رنز پر فیضان ریاض27 رنز پر آؤٹ ہوئے۔

اس موقع پر بابر اعظم اور شاہد یوسف نے ذمہ دارانہ بیٹنگ کرتے ہوئے ٹیم کے مجموعی اسکور کو 298 رنز تک پہنچا دیا، بابر اعظم نے105 اور شاہد یوسف نے96 رنز کی اننگز تراشی، سعد علی26 رنز پر ناٹ آؤٹ رہے۔ محمد اصغر، اسد شفیق، ضیا الحق اور دانش عزیز نے ایک، ایک وکٹ حاصل کی۔

جواب میں کراچی وائٹس نے فواد عالم اور دانش عزیز کی عمدہ بیٹنگ کی بدولت ہدف 49.3 اوورز میں حاصل کرلیا، کراچی کا آغاز زیادہ اچھا نہ تھا اور صرف 38 رنز پر خرم منظور 7 اور اسد شفیق 22 پویلین لوٹ چکے تھے، اس موقع پر اکبرالرحمن اور فواد عالم نے کھل کر بیٹنگ کے جوہر دکھائے اور ٹیم کے مجموعی اسکور کو 134 رنز تک پہنچا دیا، اکبر الرحمن41 رنز پر اپنی وکٹ گنوا بیٹھے جبکہ فواد عالم نے18 چوکوں کی مدد سے149 رنز بناکر اپنی ٹیم کو فتح کے قریب پہنچادیا، بعدازاں دانش عزیز نے ناٹ آؤٹ 86 رنز بناکر فتح اپنی ٹیم کی جھولی میں ڈال دی۔

رضا حسن، شہزاد اعظم، نعمان علی، احمد بشیر اور حمزہ ندیم نے ایک، ایک کھلاڑی کو آؤٹ کیا۔ فواد عالم مین آف دی میچ رہے، اسلام آباد کے شان مسعود 656 رنز کے ساتھ ٹورنامنٹ کے بہترین بیٹسمین کا ٹائٹل لے اڑے، فیصل آباد کے محمد عمران 14وکٹوں کے ساتھ ٹاپ بولر رہے، عابد علی509 رنز بنانے کیساتھ 9 کیچ پکڑ کر بہترین آل راؤنڈر کے اعزاز سے نوازے گئے۔

اختتامی تقریب کے مہمان خصوصی چیئرمین پی سی بی نجم سیٹھی کے مشیرشکیل شیخ نے کھلاڑیوں میں انعامات تقسیم کیے۔