’’ وار‘‘ کا تجربہ شاندار رہا شائقین نئے پراجیکٹس میں دیکھ کر سراہیں گے عائشہ خان

وارمیری پہلی فلم تھی، اس کے بعد بہت سے نئے پروجیکٹس سائن کیے، تعداد سے زیادہ معیار اہم ہے، اداکارہ۔ فوٹو: فائل

---

معروف اداکارہ وماڈل عائشہ خان نے کہا ہے کہ ''وار'' میں کام کرنے کا تجربہ بہت اچھا رہا اورمستقبل میں مزید اچھے پروجیکٹس میں جلوہ گرہونگی۔

''ایکسپریس''سے گفتگوکرتے ہوئے عائشہ خان نے کہا کہ کچھ عرصہ پہلے تک پاکستان فلم انڈسٹری کی حالت دیکھ کر لگ رہا تھا کہ شاید اب مشکل سے ہی یہ اپنے پاؤں پر کھڑی ہو سکے؟ مگر نئے ٹیلنٹ نے ناممکن کو ممکن کردکھایا ، جن کی کاوشوں سے بالی ووڈ کی فلموں کے مقابلے میں ہماری فلموں کو اچھا رسپانس ملا۔

عائشہ خان نے کہا کہ فلم میکنگ میں آنے والوں کی اکثریت کا تعلق ٹی وی پروڈکشن سے ہی تھا، جو روایتی کمرشل سینما کو جدید ٹیکنالوجی کے ساتھ نئے موضوعات کو لے کر فلمیں بنا رہے ہیں ۔فلم بینوں نے بھی سینما پر اس تبدیلی کو خوشی کے ساتھ قبول کیا ہے۔

اداکارہ نے کہا کہ فلم اور ٹی وی کے مزاج میں بہت فرق ہے ۔ فلم پر آپ کو فاسٹ ٹریک کے ساتھ مخصوص ٹائم میں کرداروں اور کہانی کا اختتام کرنا ہوتا ہے جبکہ ٹی وی ڈرامہ پر آپ ہر طرح سے آزاد ہوتے ہیں۔

عائشہ خان نے کہا کہ ''وار'' میری پہلی فلم تھی میرے لیے یہ تجربہ بہت اچھا رہا اوراس کے بعد بہت سے نئے پروجیکٹس سائن کیے، جن کومیرے چاہنے والے جب دیکھیں گے تووہ ان کوبہت سراہیں گے۔ انھوں نے کہا کہ ڈرامہ اور فلم کا انتخاب ہمیشہ کردار اور ٹیم دیکھ کر ہی کرتی ہوں ، میرے نزدیک تعداد سے زیادہ کوالٹی اہمیت رکھتی ہے۔