فلیگ شپ ضمنی ریفرنس کی سماعت طبیعت خراب ہونے پر نواز شریف کو رخصت

نواز شریف کے وکیل نے استغاثہ کے گواہ عبدالحنان پر جرح مکمل کرلی

ویب ڈیسک March 05, 2018

شریف خاندان کے خلاف ضمنی ریفرنس کی سماعت 7 مارچ تک ملتوی کردی گئی فوٹو:فائل

احتساب عدالت میں نواز شریف اور ان کے بچوں کے خلاف فلیگ شپ ضمنی ریفرنس کی سماعت 7 مارچ تک ملتوی کردی گئی۔

ایکسپریس نیوز کے مطابق نواز شریف، ان کی صاحبزادی مریم نواز اور داماد کیپٹن ریٹائرڈ صفدر کے خلاف فلیگ شپ ضمنی ریفرنسز کی سماعت احتساب عدالت کے جج محمد بشیر نے کی۔ سماعت کے دوران نواز شریف احتساب عدالت میں پیش ہوئے تاہم نواز شریف کے وکیل خواجہ حارث نے عدالت سے استدعاکی کہ ان کے موکل کی طبیعت خراب ہے لہٰذا انہیں جانے کی اجازت دی جائے جس پر عدالت نے میاں نواز شریف کو جانے کی اجازت دے دی۔

اس خبرکوبھی پڑھیں: جتنا ظلم کروگے عوام اتنا ہی ساتھ دیں گے

نواز شریف کے عدالت سے جانے کے بعد بھی سماعت جاری رہی جس کے دوران ان کے وکیل خواجہ حارث نے استغاثہ کے گواہ عبدالحنان پر جرح کرتے ہوئے کہا کہ آپ کی جانب سے پیش کی گئی دستاویزات کے درست ہونے کا کوئی سرٹیفکیٹ نہیں دیا گیا۔ گواہ نے کہا کہ کسی بھی کمپنی کے آفیسر یا لینڈ رجسٹری کے آفیسر نے دستاویزات کی تصدیق نہیں کی۔ گواہ عبدالحنان پر جرح مکمل ہونے کے بعد عدالت نے سماعت 7 مارچ تک ملتوی کردی۔

واضح رہے کہ گواہ عبدالحنان نے گزشتہ سماعت پر 1500 صفحات پر مشتمل دستاویزات عدالت میں پیش کی تھیں۔