پریذیڈنٹ کپ کرکٹ آفریدی اور یونس آج ایکشن میں نظرآئیں گے

ISLAMABAD/لاہور:
پریذیڈنٹ کپ کرکٹ ٹورنامنٹ میں اتوار کو چار میچزکا فیصلہ ہو گا، شاہدآفریدی اور یونس خان بھی ایکشن میں نظر آئیں گے۔

ان کی ٹیم حبیب بینک نیشنل اسٹیڈیم کراچی میں پاکستان انٹرنیشنل ایئرلائنز سے ٹکرائے گی،گروپ بی کے دوسرے میچ میں واپڈا اور اسٹیٹ بینک کا مقابلہ شہید بینظیر بھٹو اسٹیڈیم گڑھی خدا بخش میں ہونا ہے،گروپ اے میں سوئی نادرن گیس کی ٹیم ملتان اسٹیڈیم میں زرعی ترقیاتی بینک کے مقابل ہوگی، نیشنل بینک کا سامنا پورٹ قاسم سے قذافی اسٹیڈیم لاہور میں ہوگا۔ یادرہے کہ جمعے کو افتتاحی روز سوئی گیس نے مصباح الحق کی ناقابل شکست سنچری کی بدولت خان ریسرچ لیبارٹریز کو 4 وکٹ سے زیر کیا تھا۔




گروپ اے کے دوسرے مقابلے میں نیشنل بینک نے زرعی ترقیاتی بینک کو 6 وکٹ سے ہرایا۔گروپ بی کے پہلے مقابلے میں واپڈا نے پی آئی اے کو 8 وکٹ سے ٹھکانے لگایا تھا،اسٹیٹ بینک نے یوبی ایل پر 31 رنز سے فتح پائی۔ ایونٹ میں شریک 10 ٹیموں کو 2 گروپس میں تقسیم کیا گیا ہے،اے میں سوئی نادرن گیس کمپنی، خان ریسرچ لیبارٹریز، زرعی ترقیاتی بینک، نیشنل بینک اور پورٹ قاسم شامل ہیں، بی میں پاکستان انٹرنیشنل ایئرلائنز، واپڈا، اسٹیٹ بینک، یوبی ایل اور حبیب بینک کو رکھا گیا ہے۔ ٹورنامنٹ میں اتوار کو حبیب بینک اور پورٹ قاسم کی ٹیمیں پہلی بار ایکشن میں نظر آئیں گی۔