کراچی فائرنگ کے واقعات کے دوران مزید 9 افراد ہلاک 7 زخمی

ملیرمیں 24سالہ عباس شہریار،شرافی گوٹھ میں24سالہ ساجد،نیوکراچی میں45سالہ محمد علی ماراگیا، شیر شاہ میں خاتون کوقتل کردیاگیا فوٹو: فائل

---

پولیس ورینجرزکے جرائم پیشہ افرادکیخلاف کیے جانے والے آپریشنزکے باوجودشہر میں قتل وغارت کاسلسلہ رکنے کانام نہیں لے رہا،فائرنگ کے واقعات کے دوران 9 افراد ہلاک اور 7 زخمی ہوگئے۔

تفصیلات کے مطابق ملیرسٹی کے علاقے وکٹری گرائونڈکے قریب نامعلوم افراد کی فائرنگ سے 24 سالہ عباس شہریارہلاک ہوگیا ،مقتول نے چندروزقبل ہی نکاح کیاتھاجبکہ وہ اپنی پہلی اہلیہ کوچھوڑچکاتھا،مقتول کے نکاح سے اس کے اہل خانہ خوش نہیں تھے،مقتول جعفرطیارسوسائٹی کا رہائشی تھا۔شرافی گوٹھ کے علاقے ہاشم گوٹھ میں ڈیرے سے نوجوان لڑکے کی لاش ملی جسے نامعلوم ملزمان نے گردن پر گولی مارکرہلاک کیا،مقتول کی شناخت20سالہ سجادمحمدکے نام سے کی گئی،مقتول مقامی فیکٹری میں ملازمت کرتا تھا جبکہ اہل خانہ نے اس کی کسی بھی سیاسی جماعت سے وابستگی یاذاتی دشمنی سے انکار کیاہے،مقتول کوموبائل فون پرکال کرکے مذکورہ ڈیرے پربلایاگیاتھا،مقتول مانسہرہ کالونی کارہائشی جبکہ اس کاآبائی تعلق صوابی سے تھا۔

نیوکراچی صنعتی ایریامیں بشیرچوک کے قریب نامعلوم افرادکی فائرنگ سے موٹر سائیکل سوار45سالہ محمد علی ہلاک ہوگیا،مقتول محمد علی کرمنل ریکارڈ کاحامل تھا جبکہ وہ جیل بھی جاچکاتھا،مقتول پولیس کا مخبر بھی رہ چکا ہے ، فائرنگ کی زد میں آکر ایک خاتون 32 سالہ شبانہ بھی زخمی ہوگئی۔شیرشاہ میں گھرکے اندر گھس کر نامعلوم افراد نے فائرنگ کرکے 45 سالہ تاج مینہ کوہلاک کردیا،پولیس نے مقتولہ کے شوہر کو حراست میں لے لیا،مقتولہ کے شوہر نے تاج مینہ سے دوسری شادی کی تھی،وہ بھی گھر میں سورہا تھا لیکن ملزمان نے صرف خاتون کونشانہ بنایا جس بنا پر پولیس نے محمد یارکوحراست میں لے کر تفتیش کا آغاز کردیا۔



پراناحاجی کیمپ میں سریا گلی سے نوجوان کی لاش ملی جسے نامعلوم ملزمان نے شدید تشدد کا نشانہ بناکر ہلاک کردیا،مقتول کی عمر تقریباً 22 برس معلوم ہوتی ہے تاہم شناخت نہیں ہوسکی۔سچل کے علاقے سپرہائی وے کے قریب شیرخان گوٹھ سے45سالہ شخص کی لاش ملی جسے نامعلوم ملزمان نے فائرنگ کرکے ہلاک کردیا،مقتول کی شناخت نہیں ہوسکی۔کورنگی کے علاقے مہران ٹاؤن بندنمبر ایک پر28سالہ نوجوان کی لاش ملی،کار سوار ملزمان لاش پھینک کر فرار ہو گئے،مقتول کے سر پر گولی ماری گئی تھی ۔کورنگی صنعتی ایریاکے علاقے بلال کالونی مرتضی چوک کے قریب ایک گھرمیں فائرنگ سے26 سالہ منٹھار ہلاک ہو گیا۔

مقتول فیکٹری میں مزدوری کرتاتھا،آبائی تعلق اندرون سندھ سے تھا،اسی علاقہ کا رہائشی کاشف اسی محلے کی رہائشی یاسمین نامی لڑکی کو لے کر منٹھار کے گھر آیاجہاں رنگ رلیاں مناتے ہوئے کسی بات دونوں میں جھگڑا ہوا اورکاشف نے منٹھار کو فائرنگ کر کے ہلاک کر دیااور یاسمین کے ساتھ فرار ہو گیا۔اورنگی ٹاؤن سیکٹرساڑھے گیارہ رحمت چوک کے قریب ایک گھر کے باہر نامعلوم ملزمان کی فائرنگ سے40سالہ سید جعفر حسین ہلاک ہوگیا،مقتول فیڈرل بی ایریاانچولی سوسائٹی کارہائشی اور کارپینٹرتھا ،3سال قبل تک جعفر اورنگی ٹاؤن شاہ ولی اﷲ نگر میں رہائش پزیر تھا۔

واقعے کے وقت وہ اپنے سسرال سے مل کر واپس جانے کے لیے اپنی موٹر سائیکل اسٹارٹ کررہاتھا کہ نامعلوم افرادنے اس پرفائرنگ کردی۔ بلدیہ ٹائون آفریدی کالونی میں بلال مسجد کے قریب نامعلوم افراد کی فائرنگ سے18 سالہ سجاد،آرام باغ کے علاقے فرنیچر مارکیٹ کے قریب 30سالہ وسیم زخمی ہوگئے، اتحاد ٹائون میں جھنڈا لگانے پر2 گروپوں کے درمیان تصادم ہوگیا جس میں آزادانہ طور پر اسلحہ استعمال کیا گیا،فائرنگ کے باعث 3 افرادزخمی ہوگئے جنھیں نجی اسپتال پہنچایا گیا۔منگھو پیر کے علاقے گلزار آباد میں نامعلوم افراد کی فائرنگ سے عبد الکریم زخمی ہوگیا۔