کراچی آکر بہت خوشی محسوس کررہا ہوں سرویوین رچرڈز

ملنے والی محبتوں پر شکر گزار ہوں، خواہش ہے کہ پاکستان میں انٹرنیشنل کرکٹ بحال ہو، سابق کرکٹر

Sports Reporter March 23, 2018

ملنے والی محبتوں پر شکر گزار ہوں، خواہش ہے کہ پاکستان میں انٹرنیشنل کرکٹ بحال ہو، سابق کرکٹر، فوٹو: فائل

سابق عظیم ٹیسٹ بیٹسمین سر ویوین رچرڈز نے کہا ہے کہ کراچی آکر بہت خوشی محسوس کر رہا ہوں، ملنے والی محبتوں پر شکر گزار ہوں، خواہش ہے کہ پاکستان میں انٹرنیشنل کرکٹ بحال ہو۔

پی ایس ایل فرنچائز کوئٹہ گلیڈی ایٹرز کے اونر ندیم عمر کی دعوت پر کراچی آنے والے سر ویوین رچرڈز نے جناح انٹرنیشنل ایئرپورٹ پر میڈیا سے بات چیت کرتے ہوئے کہا کہ کئی برس بعد یہاں آکر خوشی محسوس کر رہا ہوں، پی ایس تھری کا فائنل دیکھنے میں لطف آئے گا، امید ہے کہ پاکستان میں انٹرنیشنل کرکٹ جلد مکمل طور پر بحال ہوگی، کوئٹہ گلیڈی ایٹرز فیصلہ کن معرکے میں پہنچتی تو زیادہ خوشی ہوتی، میں نے مینٹیور کی حیثیت سے اپنی ذمہ داری بخوبی ادا کی۔

ایک سوال پر رچرڈز نے کہا کہ ویسٹ انڈین ٹیم کا دورہ پاکستان خوش آئند ہے، وہ اچھی کارکردگی کا مظاہرہ کرتی رہی ہے، توقع ہے کہ ٹی ٹوئنٹی سیریز دلچسپ رہے گی۔ انھوں نے مزید کہا کہ پاکستان میں کرکٹ کا بہترین ٹیلنٹ موجود ہیں، پاکستانی ٹیم مزید بلندیاں حاصل کرے گی۔