شہزاد رائے کو دوسری مرتبہ ستارہ امتیاز سے نوازدیا گیا

یہاں بہت سارے ہیروز ہیں جو سماج اور معاشرے کے لیےبہت اچھے کام کررہے ہیں یہ ایوارڈ ان کےنام کرتاہوں؛ فوٹوفائل

---

نامورگلوکار اورسماجی کارکن شہزاد رائے کو دوسری مرتبہ ملک کے تیسرے بڑے سول اعزاز ستارہ امتیاز سے نوازدیاگیا۔

گلوکار شہزاد رائے کا شمار نہ صرف پاکستان کے بہترین گلوکاروں میں ہوتا ہے بلکہ وہ سماجی خدمات میں بھی پیش پیش رہتے ہیں۔ یہی وجہ ہے کہ ان کی سماجی خدمات کے صلے میں پاکستانی حکومت کی جانب سے ایک بار پھر انہیں پاکستان کے معتبر ترین ایوارڈ ستارہ امتیاز سے نوازدیا گیا۔

شہزاد رائے نے حکومت کی جانب سےایوارڈ ملنے کی خوشخبری ٹوئٹر پر تمام لوگوں کے ساتھ شیئر کرتے ہوئے لکھا کہ ''مجھے معلوم ہے کہ ہمارے ملک میں بہت سارے ہیروز سماج کی بہتری اور معاشرے کی فلاح کے لیے بے لوث خدمت کررہے ہیں لیکن انہیں عوامی طور پر کوئی نہیں پہچانتا، میں یہ ایوارڈ ان تمام لوگوں کے نام کرتا ہوں۔''

I will be honored with the Sitara-e-Imtiaz tomorrow in Islamabad. I know of so many unsung heros who may never be publicly recognised but they work everyday to reform our society. I dedicate this award to their selfless dedication.

— Shehzad Roy (@ShehzadRoy) March 22, 2018

شہزاد رائے کو ستارہ امتیاز سے نوازے جانے پر ان کے چاہنے والوں سمیت شوبز سے تعلق رکھنے والے فنکاروں نے بھی خوشی کا اظہار کیا۔ گلوکارواداکار علی ظفر نے ٹوئٹ کرتے ہوئے انہیں مبارکباد دی اور کہا کہ ''ہمیں آپ پر فخر ہے سر''۔

Proud of you sir. https://t.co/EBWeKO05xH

— Ali Zafar (@AliZafarsays) March 22, 2018

شہزاد رائے کو گزشتہ برس اقوام متحدہ کے ذیلی ادارے برائے انسداد منشیات اور جرائم کا اعزازی سفیر نامزد کیا گیا تھا جب کہ رواں ماہ 12 مارچ کو شہزاد رائے نے یواین او ڈی سی اجلاس میں پاکستان کی نمائندگی بھی کی تھی۔ شہزاد رائے کی این جی او کو 2005 کے زلزلے میں متاثرین کی بحالی کے لیے خدمات سرانجام دینے پر بھی ستارہ امتیاز سے نوازا گیا تھا۔

واضح رہے کہ ستارہ امتیاز پاکستان کا تیسرا بڑا سول اعزاز ہے جوانفرادی طور پر پاکستان کی سیکیورٹی، مفادات، عالمی امن، ثقافت اور عوامی خدمت کے لیے اہم کردار ادا کرنے والےافراد کو دیا جاتا ہے۔