آئندہ سال پی ایس ایل کے آدھے میچز پاکستان میں ہوں گے چیئرمین پی سی بی

لاہور اور کراچی کو گرین سگنل مل گیا ہے اب پشاور اور اسلام آباد کے اسٹیڈیم بنائیں گے، نجم سیٹھی

ویب ڈیسک March 23, 2018

مجھ پر یقین کریں جو کہتا ہوں وہ کرتا ہوں،نجم سیٹھی۔ فوٹو : فائل

چیئرمین پی سی بی نجم سیٹھی نے پاکستان سپر لیگ کے آدھے میچز آئندہ سال پاکستان میں کرانے کا اعلان کرتے ہوئے کہا ہے کہ اگلی پی ایس ایل میں جمعرات اور جمعہ کو یو اے ای جب کہ ہفتہ اور اتوار کو میچز پاکستان میں کرائیں گے۔

چیئرمین پی سی بی نجم سیٹھی نے نیشنل اسٹیڈیم کراچی کا دورہ کیا اور اسٹیڈیم میں اتوار کو پاکستان سپر لیگ تھری کے ہونے والے میچ کے انتظامات کا جائزہ لیا۔ اس موقع پر میڈیا سے گفتگو میں نجم سیٹھی کا کہنا تھا کہ لاہور اور کراچی کو گرین سگنل مل گیا ہے، اب پشاور اور اسلام آباد کے اسٹیڈیم بنائیں گے۔

نجم سیٹھی نے کہا کہ مجھ پر یقین کریں جو کہتا ہوں وہ کرتا ہوں، اگلے سال آدھی پی ایس ایل پاکستان میں ہوگی، جمعرات اور جمعہ کو یو اے ای جب کہ ہفتہ اور اتوار کو میچز پاکستان میں کرائیں گے، ویسٹ انڈیز کے بعد اس سال اب ممکن نہیں کہ کوئی غیر ملکی ٹیم پاکستان آئے۔