ٹنڈوآدم شادی کی تقریب میں دھماکا دولہا سمیت 7افراد زخمی

دھماکے میں دولہے کی ہلاکت کے بعد گھر میں خوشیاں سوگ میں بدل گئیں۔فوٹو فائل

---

ٹنڈو آدم کے گوٹھ میں شادی کی تقریب کے لیے لائے گئے پٹاخے کمرے میں گرمائش کے باعث زوردار دھماکے سے پھٹ گئے، دولہے سمیت 7 افراد شدید زخمی، 4 زخمی تشویشناک حالت میں سول اسپتال منتقل، پولیس نے کوئی کارروائی نہیں کی۔

تفصیلات کے مطابق ٹنڈو آدم کے خیر محمد گوٹھ میں راشد حسین ملک کی شادی کے موقع پر بارات رشید کالونی جانے کی تیاری کررہی تھی کہ گھر کے ایک کمرے میں بڑی مقدار میں رکھے ہوئے پٹاخے گرمائش کے سبب زوردار دھماکے سے پھٹ گئے جس کے نتیجے میں 20 سالہ دولہا راشد حسین ملک، 25 سالہ اللہ رکھیو، 20 سالہ طارق، 9 سالہ بلال، 8 سالہ مٹھو، 18 سالہ پرویز اور 10 سالہ وقار شدید زخمی ہوگئے.



زخمیوں کو فوری طور پر تعلقہ اسپتال ٹنڈو آدم لایا گیا جہاں 4 زخمیوں اللہ رکھا، مٹھو، طارق اور بلال کو تشویشناک حالت میں سول اسپتال حیدرآباد روانہ کردیا گیا جبکہ ٹنڈو آدم بی سیکشن پولیس نے کوئی کارروائی نہیں کی، زخمیوں کی انگلیاں، آنکھیں اور چہرہ متاثرہ ہوا ہے۔ دوسری جانب شادی کے گھر میں خوشیاں سوگ میں بدل گئیں اور ہر طرف خواتین اور بچوں کی چیخ و پکار تھی۔