کنگز الیون پنجاب کی شریک مالک پریتی زنٹا سے ’تاحیات‘ دوستی ہے یوراج

میری پریتی زنٹا کے ساتھ تاحیات دوستی ہے مگر اب میں اپنی 100 فیصد صلاحیتوں کا مظاہرہ پونے کیلیے کررہا ہوں, یوراج سنگھ. فوٹو : اے ایف پی / فائل

---

ISLAMABAD: بھارتی آل رائونڈر یوراج سنگھ کا کہنا ہے کہ میری بالی ووڈ اسٹار اور کنگز الیون پنجاب کی شریک مالک پریتی زنٹا سے 'تاحیات' دوستی ہے مگر اب میں پونے واریئرز کے لیے اپنی صلاحیتوں کا مظاہرہ کررہا ہوں۔

یوراج گذشتہ سیزن میں کینسر کے علاج کے بعد وطن واپسی کے کچھ ہی عرصہ بعد پونے واریئرز کو سپورٹ کرنے اسٹیڈیم پہنچ گئے تھے مگر اب خود بھی کھیل رہے ہیں۔ اتوار کو ان کی پرانی ٹیم کنگز الیون پنجاب نے پونے کو شکست دے دی مگر وہ انجری کے باعث یہ میچ نہیں کھیل پائے تھے۔

یوراج کا کہنا ہے کہ پنجاب میرا گھر اور میں وہیں رہتا اور پلا بڑا ہوں، میری پریتی زنٹا کے ساتھ تاحیات دوستی ہے مگر اب میں اپنی 100 فیصد صلاحیتوں کا مظاہرہ پونے کیلیے کررہا ہوں۔ کنگز الیون پنجاب کے کپتان ایڈم گلکرسٹ کا کہنا ہے کہ یوراج سنگھ نوجوان نسل کیلیے رول ماڈل کی حیثیت رکھتے ہیں،انھوں نے پریتی زنٹا کو حیران کن اور انتہائی ذہین خاتون قرار دیا۔