جب بھی نواز شریف اقتدار میں ہوتے ہیں عوام کو پیاسا رکھتے ہیں بلاول بھٹو

ارسا سندھ کو پانی نہ دے کر اس کے حق کے لیے ترسا رہا ہے، چیئرمین پیپلز پارٹی

ویب ڈیسک March 31, 2018

مسلم لیگ (ن) کی ملک دشمن پالیسی کی وجہ سے امیر امیر تر اور غریب غریب تر ہو رہا ہے، بلاول فوٹو: فائل

پاکستان پیپلز پارٹی کے چیئرمین بلال بھٹو زرداری کہتے ہیں کہ جب بھی نواز شریف اقتدار میں ہوتے ہیں عوام کو پیاسا رکھتے ہیں، لاہور میں پھول تو اگ جاتے ہیں لیکن عوام کو پینے کا پانی نہیں ملتا۔

سانگھڑ میں تقریب سے خطاب کے دوران بلاول بھٹو زرداری کا کہنا تھا کہ عوام کے بنیادی مسائل تعلیم، صحت، روزگار اور صاف پانی ہیں، عوام کو اس سے کوئی غرض نہیں کسی کو کیوں نکالا گیا، وہ خوشحالی، روزگار، روٹی، کپڑا اور مکان چاہتے ہیں، مسلم لیگ (ن) اور ان کے اتحادی ہوں یا تحریک انصاف، ان نام نہاد پارٹیوں نے صرف گالی اورالزامات کی سیاست کی، ان کے پاس عوام کے مسائل کے حل کیلیے نا تو کوئی منشور ہے اور نا ہی صلاحیت۔ ہم نے تعلیم کے میدان میں کام کیا، نئی یونیورسٹیاں اور میڈیکل کالج بنائے، کینسر کے علاج کے لیے سائبر نائف کی مشین لگائی، سائبر نائف سے کینسر کےعلاج پر 50 لاکھ روپے خرچ آتا ہے لیکن سندھ میں اس سے بالکل مفت علاج کیا جاتا ہے۔ مسلم لیگ (ن) کی ملک دشمن پالیسی کی وجہ سے امیر امیر تر اور غریب غریب تر ہو رہاہے لیکن ہم نے غربت کم کرنے کے لیے غریب خواتین کو کاروبار کے لیےقرضے دیے۔

بلاول بھٹو زرداری نے کہا کہ جب بھی نواز شریف اقتدار میں ہوتے ہیں عوام کو پیاسا رکھتے ہیں، لاہور میں پھول تو اگ جاتے ہیں لیکن عوام کو پینے کا پانی نہیں ملتا، پورا ملک پانی کی کمی کا شکار ہے لیکن سندھ سب سے زیادہ متاثر ہے، ارسا سندھ کو اپنے حصے کا پانی نہیں دے رہا اور اس کے حق کے لیے ترسا رہا ہے۔ ہم صوفی ازم کے ماننے والے ہیں لیکن ہمیں سیاست کو پیری مریدی سے الگ کرنا ہوگا۔