انڈر 16 ایشیا ہاکی کپ کی فاتح ٹیم کا وطن واپسی پر شاندار استقبال

انڈر 16 ایشیا کپ ہاکی ٹورنامنٹ کی فاتح ٹیم کا وطن واپسی پر علامہ اقبال انٹرنیشنل ایئرپورٹ پر شاندار استقبال کیا گیا.

لاہور ایئرپورٹ پر انڈر 16 ایشیا کپ ہاکی ٹورنامنٹ جیتنے کے بعد وطن لوٹنےپر پاکستان ہاکی فیڈریشن اور شائقین کی بڑی تعداد نے ٹیم کا استقبال کیا، فتح سے سرشار مداح ڈھول، باجے اورنعروں کی گونج میں کھلاڑیوں کو کندھوں پر اٹھا کر لاؤنج سے باہرلائے۔

اس موقع پر ٹیم کے چیف کوچ طاہرزمان ، پاکستان ہاکی فیڈریشن کے سیکریٹری آصف باجوہ اور کپتان زاہد ملک کا کہنا تھا کہ اس کامیابی سے آئندہ برس چین میں ہونے والی یوتھ اولمپکس کی تیاری میں مدد ملےگی۔

واضح رہے کہ سنگاپور میں کھیلے گئے فائیو اے سائیڈ ہاکی فارمیٹ کے تحت پہلی بارکھیلے گئے انڈر 16 ایشیا ہاکی کپ میں پاکستان ناقابلِ شکست رہا جب کہ قومی ٹیم نے فائنل میں بنگلہ دیش کو3کے مقابلے میں 5گول سے شکست دی تھی۔