کشمیریوں کے قتل عام کیخلاف آواز اٹھانے پر بھارتی میڈیا نے آفریدی کو آڑے ہاتھوں لے لیا

کشمیر کی صورتحال پر اقوام متحدہ اور بین الاقوامی تنظیمیں کہاں ہیں، آفریدی کی ٹوئٹ

ویب ڈیسک April 03, 2018

مقبوضہ کشمیر میں صورتحال بہت پریشان کن ہے؛ آفریدی کی ٹوئٹ؛ فوٹوفائل

قومی کرکٹ ٹیم کے سابق کپتان شاہد آفریدی کو بے گناہ و مظلوم کشمیریوں کے حق میں آواز اٹھانا مہنگا پڑگیا بھارتی میڈیا نے شاہد آفریدی کو کشمیریوں کےقتل عام پر آواز اٹھانے پر شدید تنقید کا نشانہ بنا ڈالا۔

گزشتہ دوروز کے دوران بھارتی فوج نے مقبوضہ کشمیر میں ظلم و بربریت کی انتہا کرتے ہوئے 20 معصوم و بے گناہ کشمیریوں کو شہید اور 200 سے زائد افراد کو زخمی کردیا تھا۔ بھارتی فوج کے اس انسانیت سوز سلوک پر پورا پاکستان سراپا احتجاج ہے۔ وزیر اعظم پاکستان سمیت تمام سیاستدانوں نے کشمیر میں گزشتہ دوروز سے جاری ظلم کی شدید الفاظ میں مذمت کی ہے۔

اس خبرکوبھی پڑھیں: شاہد آفریدی نے ترنگے کے ساتھ تصاویر بنوا کر بھارتیوں کے دل جیت لیے

جہاں پاکستانی سیاستدانوں سمیت ہر شعبے سے تعلق رکھنے والے افراد کشمیر میں جاری بھارتی مظالم کے خلاف آواز بلند کررہے ہیں، وہیں قومی کرکٹ ٹیم کے سابق کپتان شاہد آفرید ی بھی بے گناہ کشمیریوں کے حمایت میں آگے آگئے ہیں۔

اس خبرکوبھی پڑھیں: مقبوضہ کشمیر میں بھارت کی درندگی، 17 نوجوان شہید

شاہد آفریدی نے کشمیریوں کے حق میں ٹوئٹ کرتے ہوئے کہا ہے کہ ''مقبوضہ کشمیر میں صورتحال بہت پریشان کن ہے، ظالم حکومت اپنے حق خودارادیت اور آزادی کے لئے آواز بلند کرنے والوں کو شہید کررہی ہے، کشمیر کی صورتحال پر اقوام متحدہ اور بین الاقوامی تنظیمیں کہاں ہیں، حیرت ہے کہ یہ خونریزی کو بند کروانے کے لئے کردار کیوں ادا نہیں کررہیں۔''

Appalling and worrisome situation ongoing in the Indian Occupied Kashmir.Innocents being shot down by oppressive regime to clamp voice of self determination & independence. Wonder where is the @UN & other int bodies & why aren't they making efforts to stop this bloodshed?
— Shahid Afridi (@SAfridiOfficial) April 3, 2018

شاہد آفریدی نے اپنی ٹوئٹ میں بھارتی حکومت کے ساتھ اقوام متحدہ اور بین الاقوامی تنظیموں پر شدید تنقید کی ہے، تاہم شاہد آفریدی کا کشمیریوں کے حق میں بیان دینا اور بھارتی حکومت کی حقیقت سب کے سامنے لانا بھارتی میڈیا کو ایک آنکھ نہیں بھارہا۔ شاہد آفریدی کی ٹوئٹ نے بھارت میں طوفان کھڑا کردیا ہے اور بھارتی میڈیا انہیں شدید تنقید کا نشانہ بناتے ہوئے کہہ رہا ہے کہ آفریدی نے کشمیریوں کے حق میں ٹوئٹ کرکے بھارت کی بے عزتی کی ہے۔