چیف جسٹس کا جڑانوالہ میں 7 سالہ بچی سے زیادتی اورقتل کا ازخود نوٹس

چیف جسٹس نے واقعے سے متعلق آئی جی پنجاب سے 48گھنٹوں میں رپورٹ طلب کرلی

ویب ڈیسک April 03, 2018

چیف جسٹس نے واقعے سے متعلق آئی جی پنجاب سے 48گھنٹوں میں رپورٹ طلب کرلی فوٹو:فائل

KARACHI: چیف جسٹس آف پاکستان نے جڑانوالہ میں 7سالہ معصوم بچی مبشرہ سے زیادتی اور قتل کا ازخود نوٹس لے لیا۔

ایکسپریس نیوز کے مطابق چیف جسٹس میاں ثاقب نثار نے دو روز قبل فیصل آباد کی تحصیل جڑانوالہ میں زیادتی کے بعد قتل کی جانے والی 7سالہ معصوم بچی کے واقعے کا ازخود نوٹس لے لیا،چیف جسٹس نے واقعے سے متعلق آئی جی پنجاب پولیس سے 48 گھنٹوں میں رپورٹ طلب کرلی۔

دوسری جانب بچی کے قاتل نہ پکڑے جانے پر آج تحصیل بھر میں مکمل ہڑتال رہی، مظاہرین نے قاتلوں کی عدم گرفتاری پر سخت احتجاج کیا اور پولیس سے جلد از جلد واقعے میں ملوث ملزمان کی گرفتار کا مطالبہ کیا۔

یہ بھی پڑھیں: فیصل آباد میں یونیورسٹی طالبہ کے بعد 7 سالہ بچی بھی زیادتی کے بعد قتل

واضح رہے کہ یکم اپریل کو جڑانوالہ کے علاقے گلشن عزیز کی 7 سالہ بچی دوپہر کو اچانک لاپتہ ہوگئی تھی جس کے بعد اہلِ خانہ نے اس کی تلاش کا عمل شروع کیا لیکن انہیں کوئی کامیابی حاصل نہیں ہوئی تاہم رات گئے بچی کی لاش اس کے گھر کے قریب کھیتوں سے مل گئی۔

پولیس نے بچی کے والد محمد افضل خان کی مدعیت میں تھانہ سٹی جڑانوالہ میں نامعلوم افراد کے خلاف مقدمہ درج کرلیا۔