ایئر ہوسٹس سیلفی معاملہ نعیم بخاری نے چیف جسٹس سے معافی مانگ لی

نعیم بخاری نے گزشتہ روز چیف جسٹس سے ان کی ایئر ہوسٹسز کے ہمراہ تصویر پر اعتراض کیا تھا

ویب ڈیسک April 04, 2018

کل کی تصویر والی گفتگو پر عدالت سے معافی چاہتا ہوں، نعیم بخاری۔ فوٹو : فائل

نعیم بخاری نے چیف جسٹس سے متعلق ریمارکس پر معافی مانگتے ہوئے کہا ہے کہ گزشتہ روز تصویر والی گفتگو پر عدالت سے معافی چاہتا ہوں۔

سپریم کورٹ میں کیس کی سماعت کے دوران وکیل نعیم بخاری کا کہنا تھا کہ گزشتہ روز چیف جسٹس سے متعلق ریمارکس پر معذرت خواہ ہوں، ٹی وی پر اپنے ریمارکس کی وضاحت بھی کردی تھی، پہلے بھی میری گفتگو میڈیا میں موضوع بحث بن گئی تھی۔ انہوں نے کہا کہ کیس وکیل نہیں موکل ہارتا ہے یہ جملہ بھی میڈیا کی زینت بنا جب کہ خود کو اسٹپنی وکیل کہنا بھی میڈیا نے ہائی لائٹ کیا لہذا کل کی تصویر والی گفتگو پر عدالت سے معافی چاہتا ہوں۔

اس خبر کو بھی پڑھیں : نعیم بخاری کو چیف جسٹس کی تصویر پراعتراض

واضح رہے کہ گزشتہ روز ایک مقدمے کی سماعت کے دوران تحریک انصاف کے رہنما اور پاناما کیس میں عمران خان کے وکیل نعیم بخاری نے چیف جسٹس کی سوشل میڈیا پر چلنے والی ایئر ہوسٹسز کے ساتھ تصویر کا تذکرہ کرتے ہوئے کہا تھا کہ مجھے آپ کی اس تصویر پر اعتراض ہے۔