غیر قانونی شکار کیس میں سلمان خان کو 6 سال قید کا خدشہ
سلمان خان پر1998میں فلم کی شوٹنگ کےدوران2کالےہرنوں کےشکارکاالزام ہے
ویب ڈیسک |
April 05, 2018
بالی ووڈ کے دبنگ اداکار سلمان خان کے خلاف کالے ہرن شکار کےکیس کا فیصلہ آج جودھ پور کی عدالت میں سنایاجائے گا اگر فیصلہ سلمان خان کے خلاف آیا تو انہیں 6 برس کی سزا ہو جائے گی۔
اداکار سلمان خان پر الزام ہے کہ انہوں نے 19 سال قبل 1998 میں راجستھان کی ریاست جودھ پور میں فلم''ہم ساتھ ساتھ ہیں''کی شوٹنگ کے دوران اجازت نہ ہونے کے باوجود نایاب کالےہرنوں کا شکار کیا تھا۔ سلمان خان کے ساتھ اس مقدمے میں اداکارہ سونالی باندرے، تبو، نیلم اور اداکار سیف علی خان بھی نامزد ہیں۔ کیس کی گزشتہ سماعت30 مارچ کو ہوئی تھی جس میں جودھ پور عدالت کے جج مجسٹریٹ دیو کمار کھتری نے فیصلہ محفوظ کرتے ہوئےکہا تھا کہ کیس کا فیصلہ 5 اپریل کو سنایا جائے گا اس موقع پر انہوں نے سلمان خان سمیت مقدمے میں شامل دیگر ملزمان کو عدالت میں پیش ہونے کا حکم دیا تھا۔
اس خبرکوبھی پڑھیں: سلمان خان، کالے ہرن شکارکا کیس؛ فیصلہ محفوظ
عدالت کے حکم کے مطابق سلمان خان اپنے اہل خانہ کےہمراہ جودھ پور پہنچ گئے ہیں جب کہ مقدمے میں شامل دیگر اداکار گزشتہ روز ہی جودھ پور پہنچ گئے تھے۔ اس موقع پر عدالت کے باہر سیکیورٹی کے انتہائی سخت انتظامات کیے گئے ہیں اور بڑی تعداد میں پولیس اہلکار تعینات ہیں۔ وکیل کا کہنا ہے کہ اگر جرم ثابت ہوگیا توملزمان کو زیادہ سے زیادہ 6 سال اورکم سے کم ایک سال قید ہوسکتی ہے، اورتمام اداکاروں کو ایک جیسی سزا ملے گی۔