پی آئی اے پرواز آج نئے اسلام آباد ایئرپورٹ پر تاریخی لینڈنگ کریگی

طیارہ پرانے ہوائی اڈے سے اڑان بھر کرآدھ گھنٹے بعد نو تعمیر شدہ ایئر پورٹ پر پہلی بار اترے گا

Staff Reporter April 07, 2018

پرواز میں سی ای او مشرف رسول بھی موجود ہونگے، واپسی پرانے ایئرپورٹ پر ہو گی، ترجمان۔ فوٹو: فائل

قومی ایئر لائن کی پرواز آج دوپہر اسلام آباد کے نئے انٹرنیشنل ایئر پورٹ پرتاریخی لینڈنگ کرے گی۔

ترجمان پی آئی اے مشہود تاجور کی جانب سے جاری اعلامیے کے مطابق پی آئی اے کا ایئربس تھری ٹوینٹی جہاز جس کو پہلی آزمائشی پروازکے لیے پی کے 9001 کا نمبر دیا گیا ہے، آج دوپہر 12 بجکر 30 منٹ پراسلام آباد کے پرانے ہوائی اڈے بے نظیربھٹو انٹرنیشنل ایئر پورٹ سے اڑان بھرے گی اور روانگی کے ٹھیک آدھے گھنٹے بعد دن ایک بجے نو تعمیر شدہ ایئر پورٹ کے نئے رن وے پر اترے گی۔

اسلام آباد کے نئے ایئر پورٹ پر اترنے والی آزمائشی پرواز میں پی آئی اے کے سی ای او مشرف رسول سیان بھی موجود ہونگے، پرواز پی کے 9001 واپسی کی پرواز پی کے 9002 بن کر واپس پرانے ایئر بے نظیر بھٹو انٹرنیشنل پر اترے گی۔

واضح رہے کہ اسلام آباد کے نئے تعمیر ہونے والے وسیع و عریض بین الاقوامی ہوائی اڈے کا افتتاح رواں ماہ 20 اپریل کوکیا جائیگا۔