برآمدوائٹ کرسٹل کی مالیت ایک ارب80کروڑروپے ہے،منشیات اورگرفتار اسمگلرز کسٹمز کے حوالے کردیے ،ڈی جی میری ٹائم ایجنسی۔ فوٹو: ایکسپریس
پاکستان میری ٹائم سیکیورٹی ایجنسی کے ہیڈکواٹرز میں کسٹمز افسران کے ہمراہ پریس کانفرنس کے دوران ڈائریکٹر جنرل میری ٹائم سکیورٹی ایجنسی ریئر ایڈمرل ذکا الرحمن نے کہاکہ خفیہ اطلاعات پر ایم ایس اے نے اپنے بحری جہازوں اور تیز رفتار کشتیوں کے ذریعے 4 اپریل کی رات کھلے سمندر میں مشکو ک کشتی کا تعاقب کیا کشتی کے اندر بنے خفیہ خانوں سے 180کلو وائٹ کرسٹل برآمد کی گئی، منشیات کشتی میں انتہائی مہارت سے چھپائی گئی تھی جس کی وجہ سے آپریشن میں حصہ لینے والی ٹیموں کو منشیات کی برآمدگی میں کئی گھنٹے لگ گئے۔
ریئر ایڈمرل ذکاالرحمن کے مطابق پکڑی جانے والی منشیات کی مالیت عالمی مارکیٹ میں ایک ارب 80 کروڑ روپے ہے کارروائی کے دوران 14اسمگلر بھی حراست میں لیے گئے ہیں یہ سمندر سے پکڑی جانے والی وائٹ کرسٹل کی بڑی مقدار ہے اس سے قبل سن 2017 میں میری ٹائم سکیورٹی ایجنسی نے 1000 کلو وائٹ کرسٹل قبضے میں لی تھی۔
ڈی جی میری ٹائم سیکیورٹی ایجنسی نے مزید کہا کہ کہ منشیات کے اسمگلرون کے گینگ اور سہولت کاروں کا سراغ لگایا جائے گا پکڑی جانے والی منشیات اور گرفتار اسمگلرزکو پاکستان کسٹمز کے حوالے کردیا گیا ہے۔
تبصرے
ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔