عرفان خان کی فلم ’’بلیک میل‘‘ پاکستان میں نمائش کیلیے پیش

فلم ڈسٹری بیوشن کلب کی طرف سے ریلیزکی گئی،نقادوں نے سپر ہٹ قراردیدیا۔ فوٹو: سوشل میڈیا

---

ڈسٹری بیوشن کلب کے زیر اہتمام بالی ووڈ اسٹار عرفان خان کی نئی فلم '' بلیک میل'' سنیماؤں کی زینت بن گئی۔

منفرد موضوعات کی حامل فلموں میں بے ساختہ اداکاری سے عالمی شہرت حاصل کرنے والے بھارت کے مایہ ناز فنکار عرفان خان کی نئی فلم '' بلیک میل '' گذشتہ روز پاکستانی سنیماؤں میں نمائش کے لیے پیش کردی گئی ہے۔

ڈائریکٹر ابھینے دیو کی زیر ہدایت بنی یہ فلم ایک شادی شدہ جوڑے کی زندگی میں پیش آنے والے حیرت انگیز واقعات کا احاطہ کرتا ہے فلم میں عرفان خان نے ایک ایسے سیلز مینیجر کا کردار ادا کیا ہے جس کی بیوی پس پردہ دھوکہ دے کر کسی دوسرے شخص کے ساتھ چکر چلانے میں مصروف ہوتی ہے اور یہی سے شروع ہونے والی بلیک میلنگ کئی دیگر ایسے معاشرتی سچائیوں کو شائقین کے سامنے لاتی ہے جس سے شائقین دنگ رہنے پر مجبور ہوجاتے ہیں۔

فلم کی دیگر اسٹار کاسٹ میں کرتی کلہاری ، دیویا دتہ، اروندھے سنگھ اور اومی ویدیا نمایاں ہیں نامور فنکارہ ار میلا مٹونڈکر کا آئٹم سانگ '' بے وفا بیوٹی '' فلم کی ہائی لائٹ بن کر سامنے آیا ہے گیت کے ذریعے ار میلا مٹونڈکر کی 10برس کے وقفے کے بعد پردہ سیمیں پر واپسی ہو رہی ہے اور مذکورہ گیت شائقین میں پہلے ہی بے پناہ مقبولیت حاصل کرچکا ہے۔

ڈائریکٹر ابھینے دیو کے مطابق '' بلیک میل'' روزمرہ زندگی میں جاسوسی اور غیر ضروری چالاکیوں کے نتائج کا احاطہ کرتی ہے۔