الیکشن کے التوا کی سازشیں ناکام بنادیں گے بلاول بھٹو زرداری

پیپلزپارٹی آئندہ الیکشن میں بھرپور کامیابی حاصل کرے گی،جلد پنجاب کا دورہ کروں گا۔ فوٹو: فائل

---

پاکستان پیپلز پارٹی کے سربراہ بلاول بھٹو زرداری نے کہا ہے کہ کچھ عناصر ملک میں الیکشن کا التوا چاہتے ہیں، یہ عناصر وہی ہیں جنھوں نے 1990ء میں انتخابات کو ہائی جیک کرنے کی کوشش کی۔

پیپلز پارٹی عوام کے ساتھ مل کر انتخابات کو ملتوی کرنے کے لیے کی جانے والی تمام سازشوں کو ناکام بنادے گی اور آئندہ انتخابات میں بھرپور کامیابی حاصل کریگی۔ وہ بدھ کو پیپلز پارٹی کراچی میڈیا سیل میں وڈیو لنک پر پیپلز پارٹی پنجاب کے رہنمائوں اور سابق وزرائے اعظم یوسف رضا گیلانی، راجا پرویز مشرف اور میاں منظور احمد وٹو سے گفتگو کررہے تھے۔ ذرائع کے مطابق بلاول بھٹو زرداری نے ان رہنمائوں سے ملک کی سیاسی صورتحال، آئندہ انتخابات خصوصاً پنجاب میں پیپلز پارٹی کی انتخابی حکمت عملی اور مختلف جماعتوں سے ہونے والی سیٹ ایڈجسٹمنٹ پر تبادلہ خیال کیا ۔



بلاول بھٹو زرداری نے کہا کہ شہید بینظیر بھٹو کی مفاہمتی پالیسی کی وجہ سے ملک میں جمہوریت مضبوط ہوئی او رجمہوریت کے استحکام کیلیے مزید کوششیں جاری رکھیں گے۔ ماضی میں بھی پیپلز پارٹی کے خلاف سازشیں کی گئیں، اب بھی سازشیں کی جارہی ہیں لیکن یہ سازشیں کامیاب نہیں ہوں گی۔ انھوں نے کہا کہ آئندہ انتخابات سے ملک کا مستقبل وابستہ ہے، پیپلز پارٹی پنجاب میں بھرپور کامیابی حاصل کرے گی۔ انھوں نے کہا کہ وہ جلد پنجاب کا تفصیلی دورہ کریں گے ۔