ن لیگ کے 6 ارکان اسمبلی کا پارٹی چھوڑ کر ’جنوبی پنجاب صوبہ محاذ‘ بنانے کا اعلان

10 ارکان پنجاب اسمبلی اور 5 ارکان قومی اسمبلی کی حمایت حاصل ہے، منحرف ارکان اسمبلی۔ فوٹو:ایکسپریس

---

لاہور: مسلم لیگ (ن) کے 5 ارکان قومی اور ایک رکن صوبائی اسمبلی نے علم بغاوت بلند کرتے ہوئے 'جنوبی پنجاب صوبہ محاذ' بنانے کا اعلان کردیا۔

حکمران جماعت پاکستان مسلم لیگ (ن) کی مشکلات ختم ہونے کے بجائے مزید بڑھتی جارہی ہیں۔ لاہور میں جنوبی پنجاب سے تعلق رکھنے والے مسلم لیگ ن کے منحرف اراکین اسمبلی نے پریس کانفرنس کرتے ہوئے پارٹی چھوڑ کر جنوبی پنجاب صوبہ محاذ بنانے کا اعلان کردیا۔ منحرف ارکان اسمبلی میں مخدوم خسرو بختیار، طاہر بشیر چیمہ، مخدوم باسط علی بخاری، طاہر اقبال چوہدری اور رانا قاسم نون شامل ہیں جب کہ ایک آزاد امیدوار شامل ہے۔

'' میر بلخ شیر مزاری جنوبی پنجاب صوبہ محاذ کے سرپرست ہوں گے ''

سابق وزیر مخدوم خسرو بختیار نے کہا کہ (ن) لیگ اور پارلیمنٹ کی نشستوں سے مستعفی ہونے اور 'جنوبی پنجاب صوبہ محاذ' بنانے کا فیصلہ کیا ہے، میر بلخ شیر مزاری اس محاذ کے سرپرست ہوں گے، ہم ایک ہی سیاسی نظریاتی ایجنڈے پر اکھٹے ہیں، ہمارا مقصد نئے صوبے جنوبی پنجاب کا قیام ہے، ہمیں 10 سے زائد ارکان پنجاب اسمبلی اور 5 سے زائد ارکان قومی اسمبلی کی حمایت حاصل ہے۔

'' ہماری حمایت کے بغیر کوئی الیکشن نہیں جیت سکے گا ''

رانا قاسم نون نے کہا کہ ہماری حمایت کے بغیر کوئی الیکشن نہیں جیت سکے گا، جب محرومیاں بڑھ جاتی ہیں تو مایوسی میں اضافہ ہوتا ہے، یہ حساس مسئلہ ہے، نیا صوبہ بننے سے وفاق مضبوط ہوگا۔