کھوکھراپاراورجعفرسوسائٹی میں دستی بم حملے ایک شخص زخمی

پولیس کے مطابق نامعلوم ملزمان نے فریدہ گارڈن کی 6 فٹ کی بانڈری وال کے دوسری طرف سے صبح 6 بجے دستی بم پھینکا تھا۔ فوٹو: فائل

---

ISLAMABAD: ملیر جعفر طیار سوسائٹی اور کھوکھرا پار میں دستی بم حملوں میں ایک شخص زخمی ہو گیا۔

ایک گھر کو بھی نقصان پہنچا ، تفصیلات کے مطابق ملیر سٹی کے علاقے جعفر طیار سوسائٹی میں واقع فریدہ گارڈن کے قریب نامعلوم ملزمان دستی بم پھینک کر فرار ہوگئے جو زور دار دھماکے سے پھٹ گیا جس کے نتیجے میں ایک راہگیر55 سالہ زمرد حسین ولد یوسف حسین زخمی ہوگیا ۔



پولیس اور رینجرز کی بھاری نفری موقع پر پہنچ گئی اور بم ڈسپوزل یونٹ کے عملے کو طلب کر لیا، پولیس کے مطابق نامعلوم ملزمان نے فریدہ گارڈن کی 6 فٹ کی بانڈری وال کے دوسری طرف سے صبح 6 بجے دستی بم پھینکا تھا ، دستی بم روسی ساختہ تھا ، زخمی ہونے والے زمرد حسین کی حالت خطرے سے باہرہے ، ان کے بیٹے سید رضوان کی مدعیت میں نامعلوم ملزمان کے خلاف مقدمہ درج کر لیا گیا ۔

سعودآباد کے علاقے کھو کھرا پار ایچ ایریا مکان نمبر9/5 پر نامعلوم موٹر سائیکل سوارملزمان دستی بم پھینک کر فرار ہوگئے، دستی بم زور دار دھماکے سے پھٹ گیا ، پولیس اور رینجرز کی بھاری نفری موقع پر پہنچ گئی اور بم ڈسپوزل کے عملے کو طلب کر لیا ، پولیس کے مطابق جس گھر میں دھماکا ہوا ہے وہ پی آئی اے کے ریٹائرڈ ملازم شہاب الدین کا ہے، دھماکے سے مکان کی کھڑکیوں کے شیشے ٹوٹ گئے ،اے سی کو نقصان پہنچا۔