سابق مس ورلڈ پوجا چوپڑا آج فلم ’’ کمانڈو‘‘ میں جلوہ گر ہونگی

عالمی مقابلہ حسن جیتنے پر حوصلے بڑھے ،منفردکردار نبھانے کی خواہش جستجو جاری رکھنے پر مجبور کرتی رہی، بالی وڈ اداکارہ و ماڈل۔ فوٹو: فائل

---

سابقہ مس ورلڈ اور مس انڈیا ماڈل و اداکارہ پوجا چوپڑا نئی بالی وڈ ایکشن مووی ''کمانڈو''میں آج جلوہ گرہونگی۔قبل ازیں بالی وڈ میں فلم ''فیشن ''میں کیرئیر کا آغاز کرنے والی اداکارہ پوچاچوپڑا آج پھر سلور اسکرین پر اداکاری کے جوہر دکھانے کے لیے تیار ہیں۔

2009 میں مس انڈیا کا تاج سرپر سجانے والی اداکارہ پوجا چوپڑا کی فلم ''کمانڈو''کو آج ( 12فروری کو) سینمائوں کی زینت بنانے کے لیے سنسر بورڈ سے اجازت مل گئی ہے ۔پوجا چوپڑا کی یہ پہلی بھارتی فلم ہوگی جس میں وہ لیڈنگ لیڈی رول نبھائیں گی۔ اداکارہ نے اب تک صرف دو ہندی فلموں میں اداکاری کے جوہر دکھائے ہیں ان میں پہلی فلم'' فیشن'' اور دوسری فلم '' ہیروئن ''ہے جس میں پوچا چوپڑا نے سمرن کے کردار میں مختصر کام کیا اور اپنی پرفارمنس سے شائقین کے دل جیت لیے۔

اداکارہ پوجا کو ہدایت کار دلیپ گھوش کی ایکشن، رومانوی فلم ''کمانڈو'' میں اہم کردار کے لیے منتخب کیا گیا تو انھوں نے اس پیش کش کو چیلنج سمجھ کر قبول کیا ،فلم مکمل ہوچکی ہے اس کی تشہیری مہم زورں پر ہے اور سینما گھروں میں اس کی نمائش کے حوالے سے بھی تمام انتظامات مکمل کرلیے گئے ہیں۔ اداکارہ پوجا چوپڑا نے کہا ہے کہ نئی فلم میں اہم کردار ملنے پر خوشی ہوئی ہے۔ 29 سالہ اداکارہ پوجا چوپڑا نے بتایا کہ فلم میں میرٹ پر مجھے منتخب کیا گیا اور میں خود بھی یہ سمجھتی ہوں کہ اس کردار کے لیے مجھے منتخب کرنے کا فیصلہ بہت اچھا ہے ،اس کردار کو خوبی سے نبھا کر اپنی صلاحیتوں کو ثابت کرنے کی کوشش کی ہے۔



اداکاری کے شعبے میں ہر فنکار کو یہ خواہش ہوتی ہے کہ منفرد اور روٹین سے ہٹ کر کردار ملیں اور انھیں پذیرآئی بھی حاصل رہے ۔یہی خواہش فنکار کو جستجو جاری رکھنے پر مجبور کرتی رہتی ہے۔ پہلی فلم میں کوئی اہم کردار نہ ملنے کے باوجود اپنے حصے کے کام کو خلوص اور لگن سے مکمل کرکے حق ادا کرنے کی کوشش کی تھی اسی پرفارمنس کی بنا پر مجھے کئی فلموں میں کام کرنے کی پیشکشیں ہوئیں، آج جس فلم کی ریلیز ہورہی ہے یہ میری زندگی کے لیے انتہائی اہم موڑ ثابت ہوگی۔ انھوں نے کہا کہ بالی وڈ میں نئے چہروں کو آگے لانے کے بے شمار مواقع موجود ہیں اور یہی سبب ہے کہ اچھا ٹیلنٹ متعارف ہوکر الگ مقام اور شناخت بنانے میں تیزی سے جاری ہے۔

انھوں نے کہا کہ 2009 کے دوران مس ورلڈ کے مقابلے کے لیے جانا اور پھر ' بیوٹی ود اے پرپز 'جیسا ایوارڈ جیتنا بھی میرے لیے بہت بڑا اعزاز ہے ۔انھوں نے کہا کہ جنوبی افریقہ میں سجی ہوئی وہ تقریب ناقابل فراموش ہے جس نے میری زندگی میں حوصلے اور امنگوں کی نئی طرح ڈال دی تھی ۔اداکارہ پوجا چوپڑا کا کہنا ہے کہ نئی فلموں میں اچھے کردار ملنے پر ہی کام کرسکوں گی، اپنی الگ شناخت بنانا چاہتی ہوں ۔میگا اسٹار کے ساتھ کام کرکے زیادہ خوشی محسوس کرتی ہوں۔ اپنی خوبیوں اور خامیوں پر نظر رکھتی ہوں ، خامیوں کو دور کرنے کے لیے خود ہی اپنی نگرانی کرتی رہتی ہوں ۔انھوں نے کہا کہ بالی وڈ میں میری فلم کی کامیابی کا یقین ہے تاہم اس کا فیصلہ آج شائقین کریں گے۔

واضح رہے کہ 1985 کو مہاراشٹر کے علاقے پونے میں پیدا ہونے والی اداکارہ پوجا چوپڑا نے فلمی سفر کا آغاز2008میں ہندی فلم ''فیشن ''میںمختصر آمد سے ہوا ۔اس کے بعد پوجا چوپڑا نے 2011 میں تامل فلم ''پونار شنکر''میں کام کیا اس فلم میں ان کی بھرپور پرفارمنس رہی ۔سائوتھ کے سینماگھروں میں اداکارہ کی پہلی فلم کی ریلیز کے بعد وہاں پر ان کی پرفارمنس کے بہت چرچے ہوئے، سنجیدہ فلمی حلقوں کی جانب سے ان کی اداکاری پر تبصرے ہوئے اور انھیں مستقبل کی بڑی اداکارہ قرار دیا جانے لگا۔ اسی اثناء میں ہدایت کار مدھر بھنڈاریکر نے اپنی فلم ''ہیرئن ''میں مختصر کردار دیا، 2012 کو جب فلم ''ہیروئن ''سینما گھروں کی زینت بنائی گئی تو اداکارہ کی مختصر آمد کا بھی نوٹس لیا گیا ۔بالی وڈ کے ہدایتکاروں اور پروڈیوسرز کی جانب سے پوجا چوپڑا کو نئے پراجیکٹس کے لیے کاسٹ کرنے کی آفرز ہونے لگیں اور یہ سلسلہ تاحال جاری ہے۔