نگراں سندھ کابینہ میں توسیع کا فیصلہ کیا گیا ہے جس کے تحت 3 نئے وزیر آج حلف اٹھائیں گے جبکہ 2 مشیروں کو بھی شامل کیا جائے گا ۔
ایکسرپیس نیوز کے مطابق گورنر ہاؤس کراچی میں شام 5 بجے کابینہ میں شامل کئے گئے نئے وزرا کی تقریب حلف برداری ہوگی ، گورنر سندھ ڈاکٹر عشرت العباد خان حسن علی شریف، جعفر خواجہ اور شجاع جونیجو سے نگراں وزیر کی حیثیت سے حلف لیں گے جس کے ساتھ نگراں کابینہ کےوزیروں کی تعداد 18 ہوجائے گی۔
دوسری جانب ڈاکٹر شفقت عباسی اور فیاض شیخ کو وزیر اعلٰی سندھ کا مشیر مقرر کرنے کا بھی فیصلہ کیا گیا ہے، 2 مشیروں کے تقرر کے بعد نگراں وزیراعلیٰ کے مشیروں کی تعداد 5 ہوجائے گی، ان مشیران کی حیثیت اور اختیارات وزیر ہی کے برابر ہوں گے۔