الیکشن کمیشن نے شریف برادران کےکاغذات نامزدگیوں کی منظوری کے خلاف دائر اپیلوں کی سماعت کے لئے نیا ٹریبونل تشکیل دے دیاہے۔
الیکشن کمیشن کی جانب سے جاری نوٹیفیکیشن کے مطابق لاہور ہائی کورٹ کے جج جسٹس ناصر سعید شیخ اورجسٹس شاہد وحید پر مشتمل نیا ٹریبونل تشکیل دے دیا گیا ہے جو مسلم لیگ (ن) کے صدر نواز شریف اور سابق وزیر اعلیٰ پنجاب شہباز شریف کے کاغذات نامزدگیوں کے خلاف اعتراضات کی سماعت کرے گا۔
واضح رہے کہ جسٹس خواجہ امتیازاحمد اور جسٹس خالد محمود خان پر مشتمل الیکشن ٹریبونل نے شریف برادران کے خلاف اپیلوں کی سماعت سے معذرت کرلی تھی جس کے بعد الیکشن کمیشن نے ان اعتراضات کی سماعت کے لئے نیا ٹریبونل تشکیل دیا ہے۔