احسن اقبال پرحملہ وزیر اعظم صدر آرمی چیف اورسیاسی رہنماؤں کا اظہارمذمت

آرمی چیف نے احسن اقبال کی جلد صحت یابی کے لیے نیک خواہشات کا اظہار کیا

ویب ڈیسک May 06, 2018

آرمی چیف نے احسن اقبال کی جلد صحت یابی کے لیے نیک خواہشات کا اظہار کیا (فوٹو: فائل)

صدرمملکت ممنون حسین، وزیر اعظم شاہد خاقان عباسی اور آرمی چیف جنرل قمر جاوید باجوہ سمیت مختلف سیاسی رہنماؤں نے وفاقی وزیر داخلہ احسن پرقاتلانہ حملے کی شدید الفاظ میں مذمت کی ہے۔

صدر مملکت ممنون حسین نے احسن اقبال پر حملے کی مذمت کرتے ہوئے کہا ہے کہ اختلاف کا اظہار تشدد کے ذریعے نہیں ہونا چاہئے، عدم برداشت معاشرے کے لیے زہر قاتل اور استحکام کی راہ میں سب سے بڑی رکاوٹ ہے جب کہ ملک میں انتشار اور تشدد کے فروغ کی ہر کوشش سختی سے کچل دی جائے گی۔

وزیراعظم شاہد خاقان عباسی نے وزیر داخلہ پر حملے کی شدید الفاظ میں مذمت کرتے ہوئے ان کی جلد صحت یابی کے لیے دعا کی۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے وزیر داخلہ احسن اقبال پر حملے کی شدید مذمت کی۔ آرمی چیف نے احسن اقبال کی جلد صحت یابی کے لیے نیک خواہشات کا اظہار کیا۔

COAS condemns firing on Federal Interior Minister Ahsan Iqbal. Expresses best wishes for early recovery.
— DG ISPR (@OfficialDGISPR) May 6, 2018

گورنر سندھ محمد زبیر نے وزیر داخلہ پر قاتلانہ حملہ کی شدید مذمت کرتے ہوئے کہا کہ احسن قبال پر حملہ امن تباہ کرنے کی سازش ہے، دہشت گرد اپنے مذموم مقاصد میں کسی صورت کامیاب نہیں ہوسکتے۔

Strongly condemn the assassination attempt on my friend Ahsan Iqbal... Just spoke to him & he is in high spirits MashaAllah ... Those who indulged in this heinous act will be brought to justice... PMLN will not be browbeaten into submission... Prayers for quick recovery!! -ss

- Shehbaz Sharif (@CMShehbaz) 6 May 2018

وزیر اعلیٰ پنجاب میاں شہباز شریف نے کہا ہے کہ میں اپنے دوست پر قاتلانہ حملے کی شدید مذمت کرتا ہوں جس نے یہ بھی ایسا قبیح فعل سرانجام دیا ہے اسے انصاف کے کہٹرے میں لایا جائے میں احسن اقبال کی جلد صحت یابی کے لیے دعاگو ہیں۔

الّلہ رب العزت احسن اقبال صاحب کو زندگی اور صحت عطا فرمائے۔ آمین۔یہ ملک ہمارا ہے اور اس میں بگاڑ پیدا کرنے والی قوتوں کا محاسبہ کرنا ہو گا۔ - Maryam Nawaz Sharif (@MaryamNSharif) 6 May 2018

سابق وزیر اعظم کی صاحبزدی مریم نواز نے احسن اقبال کی صحت یابی کے لیے دعا کرتے ہوئے کہا کہ حملہ آور محض ایک آلہ کار ہے اصل مجرم وہ ہیں جنہوں نے اپنے سیاسی مفاد کے لیے اسے اکسایا اور استعمال کیا، یہ ملک ہمارا ہے اور ہمیں اس میں بگاڑ پیدا کرنے والی قوتوں کا محاسبہ کرنا ہوگا،

Shooter is only a vehicle. Those patronising them, those inciting them for political gains & those using them to settle scores real CULPRITS https://t.co/OBzEBu3ODI

- Maryam Nawaz Sharif (@MaryamNSharif) 6 May 2018

چیئرمین تحریک انصاف عمران خان نے سماجی رابطے کی ویب سائٹ پر وزیر داخلہ پر حملے کی مذمت کرتے ہوئے کہا کہ احسن اقبال پر حملے کی شدید مذمت کرتا ہوں۔

میں احسن اقبال پر حملے کی شدید مذمت کرتا ہوں۔
— Imran Khan (@ImranKhanPTI) May 6, 2018

پاکستان پیپلز پارٹی کے چئیرمین بلاول بھٹو زرداری نے احسن اقبال پر حملے کی شدید مذمت کی اور کہا کہ یہ وزیر داخلہ پر حملہ نہیں، ریاست پر حملہ ہے، حملے میں ملوث ملزمان کو جلد از جلد کیفر کردار تک پہنچایا جائے۔

جماعت اسلامی کے امیر سراج الحق نے کہا کہ احسن اقبال پر حملہ انتہائی بزدلانہ کارروائی ہے حملہ کرنے والوں کو قرار واقعی سزا دی جائے اور حملے کے پس پردہ عزائم بے نقاب ہونے چاہئیں۔

پیپلز پارٹی پنجاب کے صدر قمر زمان کائرہ نے کہا کہ ہم ایسے حملوں کی شدید مذمت کرتے ہیں، حکومت کو چاہیے وہ ملک میں سیکیورٹی کے انتظامات درست کرے اور یہ الیکشن سے پہلے حالات کو خراب کرنے کی سازش ہوسکتی ہے جب کہ تحریک انصاف کی رہنما شیریں مزاری نے کہا کہ ہمارے سیاسی اختلافات اپنی جگہ لیکن احسن اقبال پر حملہ ناقابل قبول ہے، پاکستان میں عدم برداشت وباء کی طرح پھیل رہی ہے۔

پاکستان میں متعین امریکی سفیر ڈیوڈ ہیل نے بھی وزیر داخلہ پر حملے کی شدید مذمت کرتے ہوئے کہا کہ احسن اقبال کی جلد صحت یابی کے لیے دعاگو ہیں۔