الیکشن کمیشن نے انتخابی عمل کی نگرانی کیلئے سینیٹ کی کمیٹی کا مطالبہ مسترد کردیا

الیکشن کمیشن نے انتخابی عمل کی نگرانی سے متعلق سینیٹ کی خصوصی کمیٹی کا مطالبہ مسترد کردیا۔

اسلام آباد میں میڈیا سے بات کرتے ہوئے سیکریٹری الیکشن کمیشن اشتیاق احمد خان نے کہا کہ انتخابات کی راہ میں کوئی رکاوٹ نہیں آنے دیں گے، الیکشن کمیشن کو مکمل آئینی اختیارات حاصل ہیں۔ انہوں نے کہا کہ الیکشن کمیشن نے 25 اپریل کو اہم اجلاس طلب کیا ہے جس میں صوبائی حکومتوں اور وزارت داخلہ و دفاع کے اعلیٰ حکام شرکت کریں گے، اجلاس میں فوج کی تعیناتی سے متعلق امور کو حتمی شکل دی جائے گی۔

اشتیاق احمد نے کہا کہ بیرون ملک مقیم پاکستانیوں کو ووٹ کا حق دینے کے لئے قانون سازی کی جارہی ہے اس سلسلے میں آرڈیننس 2 روز میں تیار کر لیا جائے گا۔ انہوں نے کہا کہ بیلٹ پیپرز کی چھپائی کا کام کل سے شروع ہوگا جو 30 اپریل تک جاری رہے گا۔