امریکی صدر اور شمالی کوریا کے سربراہ کی ملاقات 12 جون کو ہوگی

ملاقات کو عالمی امن کے لیے اہم بنانے کی بھرپور کوشش کریں گے، ڈونلڈ ٹرمپ

---

امریکی صدر ڈونلڈ ٹرمپ اور شمالی کوریا کے سربراہ کم جونگ ان کی ملاقات 12 جون کو سنگاپور میں ہوگی۔

شمالی اور جنوبی کوریا کے سربراہان کے درمیان تاریخی ملاقات کے بعد 12 جون کو ایک اور تاریخی اقدام ہونے جارہا ہے، امریکی صدر ڈونلڈ ٹرمپ نے سماجی رابطے کی ویب سائٹ پر ٹوئٹ کرتے ہوئے شمالی کوریا کے سربراہ کم جونگ ان سے 12 جون کو سنگاپور میں ملاقات کا اعلان کردیا۔

The highly anticipated meeting between Kim Jong Un and myself will take place in Singapore on June 12th. We will both try to make it a very special moment for World Peace!

— Donald J. Trump (@realDonaldTrump) May 10, 2018

اپنی ٹوئٹ میں ڈونلڈ ٹرمپ کا کہنا تھا کہ ہم دونوں اس ملاقات کو عالمی امن کے لیے اہم بنانے کی بھرپور کوشش کریں گے۔

خیال رہے یہ کسی بھی امریکی صدر اور شمالی کوریا کے سربراہ کے درمیان پہلی ملاقات ہوگی جس کا اعلان شمالی کوریا کی جانب سے 3 امریکی قیدیوں کی رہائی کے بعد سامنے آیا۔

اس سے قبل شمالی کوریا کی جانب سے خطے میں امن کے فروغ کے لیے اہم اقدامات دیکھنے میں آئے ہیں جس میں پہلے انہوں نے مزید میزائل تجربات نہ کرنے اور اپنی جوہری تجربہ گاہ کو بند کرنے کا اعلان کیا اور اس کے بعد جنوبی کوریا کے سربراہ سے تاریخی ملاقات بھی کی۔