ٹریفک حادثات میں 2 افراد ہلاک فائرنگ سے 2 زخمی

گلشن معمار میں تیز رفتار ٹرک کی ٹکر سے ایک شخص ہلاک ہوگیا جس کی لاش عباسی شہید اسپتال پہنچائی گئی۔ فائل فوٹو

---

KARACHI: شہرکے مختلف علاقوں میں ٹریفک حادثات میں2 افراد ہلاک ہوگئے ،تفصیلات کے مطابق شارع فیصل پر تیز رفتار بس نے موٹر سائیکل سوار نوجوان کو کچل کر ہلاک کردیا ، متوفی کی لاش ایدھی ایمبولینس کے ذریعے جناح اسپتال پہنچائی گئی ، متوفی کی شناخت محمد مظہر ولد جان محمد کے نام سے ہوئی جس کی عمر 35 برس تھی ، متوفی کی ڈیڑھ برس قبل شادی ہوئی تھی جبکہ حال ہی میں ایک بیٹی کی ولادت بھی ہوئی تھی ،متوفی شاہ فیصل کالونی کا رہائشی جبکہ نجی بینک میں ملازمت کرتا تھا ، پولیس نے ضابطے کی کارروائی کے بعد لاش ورثا کے حوالے کردی۔

علاوہ ازیں گلشن معمار میں تیز رفتار ٹرک کی ٹکر سے ایک شخص ہلاک ہوگیا جس کی لاش عباسی شہید اسپتال پہنچائی گئی جہاں متوفی کی شناخت نعیم ولد گل زرین کے نام سے ہوئی ، متوفی کی عمر تقریباً 35 برس معلوم ہوتی ہے ،دریں اثنا ناظم آباد میں نامعلوم ملزمان کی فائرنگ سے 2 نوجوان زخمی ہوگئے ، زخمیوں کو فوری طور پر طبی امداد کے لیے عباسی شہید اسپتال پہنچایا گیا۔

تفصیلات کے مطابق جمعرات اور جمعہ کی درمیانی شب ناظم آباد دو نمبر پر واقع پٹرول پمپ کے قریب موٹر سائیکل سوار نامعلوم ملزمان کی فائرنگ سے2 نوجوان ذیشان اور عدیل زخمی ہوگئے جنھیں فوری طور پر طبی امداد کیلیے عباسی شہید اسپتال پہنچایا گیا۔

ایس ایچ او گلبہار عارف رزاق نے ایکسپریس کو بتایا کہ فوری طور پر واقعے کی نوعیت کے بارے میں معلوم نہیں ہوسکا ہے تاہم پولیس تحقیقات کررہی ہے کہ واقعہ ڈکیتی میں مزاحمت کا شاخسانہ ہے یا ذاتی دشمنی کا نتیجہ ہے،زخمیوں کوعلاج معالجے کے لیے اسٹیڈیم روڈ پر واقع نجی اسپتال منتقل کردیا گیا ہے جس کی وجہ سے ابھی ان کا بیان بھی نہیں لیا جاسکا ہے۔