الیکشن کی گہما گہمی سے شوبز انڈسٹری متاثر ہورہی ہے حنا دلپذیر

اداکارہ حنا دلپذیر نے کہا ہے کہ الیکشن کی گہماگہمی کی وجہ سے شوبزانڈسٹری متاثر ہو رہی ہے۔


ان خیالات کا اظہار انھوں نے نمائندہ ایکسپریس سے بات چیت کے دوران کیا۔ ان کا کہنا تھا کہ پاکستان کاماضی کوئی خاص اچھا نہیں رہا اب تولب خاموش ہیں اور نگاہیں آسماں کی جانب لگی ہوئی ہیں خدارب تعالی خطائیں معاف کرنے والا ہے میری دعا ہے کہ پاکستان میں کوئی ایسا حکمران آجائے جو انسانیت کی تکمیل پریقین رکھتا ہو۔

ایک سوال کے جواب میں اداکارہ حنا دلپزیر کا کہنا تھا کہ مجھے کسی سیاسی جماعت سے ہمدردی نہیں ہے نہ ہی کبھی سیاست میں آنے کا سوچا ہے مگر ملک کے بارے میں بہت سنجیدگی سے سوچتی ہوں اس کا حال دیکھ کراس کے مستقبل کی فکر ستاتی ہے۔ انھوں نے مزید کہا کہ ہم جب تک ذہنی طورپران الجھنوں سے نہیں نکلیں گے تب تک کوئی کریٹیوبات نہیں کی جا سکتی۔ ہمارے لکھاریوں کو چاہیے کہ ملکی مسائل کوعوام کے سامنے پیش کریں تاکہ مسائل کاحل نکل سکے۔