سلمان کی فلم ’’ ٹائیگرزندہ ہے‘‘ کے گیت نے تمام ریکارڈ توڑ دیے

سلمان خان کی فلم ’ٹائیگر زندہ ہے‘ 20 دسمبر کو ریلیز ہوئی تھی جو اب تک دوسو کروڑ سے زائد کا بزنس کر چکی ہے۔فوٹو: فائل

---

بالی ووڈ کے سلطان سلمان خان کی فلم '' ٹائیگرزندہ ہے'' کے گیت ''سواگ سے سواگت '' نے نئے ریکارڈ قائم کردیئے ہیں۔

بالی ووڈ کے دبنگ اداکار سلمان خان کو باکس آفس کا سلطان کہا جاتا ہے کیوں کہ ان کی تقریباً ہر فلم 100 کروڑ سے زائد کا بزنس کرتی ہے یہی وجہ ہے کہ ان کی فلم ' ٹائیگر زندہ ہے' نے توقعات سے بڑھ کربزنس کرکے کئی رکارڈ قائم کیے جب کہ اب اسی فلم کے گیت نے بھی کامیابی کے رکارڈ قائم کرکے سوشل میڈیا پر ہلچل مچا دی۔

بالی ووڈ کی باربی ڈول کترینہ کیف کی جانب سے سماجی رابطے کی ویب سائٹ انسٹا گرام پر سلمان خان کی فلم 'ٹائیگر زندہ ہے' کے مشہور گیت سے متعلق اسٹوری شیئر کی جس میں انہوں نے بتایا کہ اس فلم کا گیت 'سواگ سے سواگت' یوٹیوب پر سب سے زیادہ دیکھے جانے والا گیت بن گیا ہے۔


رپورٹس کے مطابق یش راج فلم کی جانب سے یوٹیوب پر 20 نومبر 2017 کو جاری کردہ گیت 'سواگ سے سواگت' کو اب تک 42 کروڑ 80 لاکھ 73 ہزار سے زائد مرتبہ دیکھا گیا ہے۔

یہ خبر بھی پڑھیں: فلم ' ٹائیگر زندہ ہے' نے ریکارڈ بک الٹ پلٹ کردی

دوسری جانب بالی ووڈ سلطان کی نئی ایکشن اور تھرل سے بھرپور فلم 'ریس تھری' کا ٹریلر بھی گزشتہ روز ہی جاری کیا گیا جسے مداحوں کی جانب سے بے حد پسند کیا جارہا ہے اور اس ٹریلر کو اب تک 10 ملین سے زائد لوگ دیکھ چکے ہیں۔


واضح رہے کہ فلم ''ٹائیگرزندہ ہے'' سلمان اور کترینہ کی 2012 میں ریلیز کی گئی سپر ہٹ فلم ''ایک تھا ٹائیگر''کا سیکوئل ہے جس میں سلو میاں نے بھارتی اور کترینہ نے پاکستانی ایجنٹ کا کردارنبھایا تھا۔