اداکارہ ارمینا خان کا اردن جاکر مظلوم شامی مہاجرین کی مدد کا فیصلہ

میں شام میں ہونے والے تنازعہ، ظلم وبربریت کو کئی سالوں سے دیکھ رہی ہوں،لیکن اب وقت آگیا ہے کچھ کرنے کا، ارمینا خان

---

پاکستانی اداکارہ ارمینا خان نے اردن میں موجود مظلوم شامی پناہ گزین کی مدد کرنےکا فیصلہ کیا ہے۔

پاکستانی اداکارہ ارمینا خان اداکاری کے علاوہ سماجی سرگرمیوں میں بھی پیش پیش رہتی ہیں اورسوشل میڈیا کے پلیٹ فارم پراپنی آواز بلند کرنے سے کبھی پیچھے نہیں ہٹتیں۔ حال ہی میں انہوں نے انسٹاگرام پر اعلان کیا ہے کہ وہ اردن میں موجود مظلوم و بے گھر شامی پناہ گزین کیلئے نہ صرف خود عطیہ جمع کریں گی بلکہ اردن جاکر یہ عطیات خود ان لوگوں کو دیں گی۔

اس خبرکوبھی پڑھیں: ہراسانی کا تعلق لباس سے نہیں، مجھے برقعے میں بھی ہراساں کیا گیا

ارمینا خان نے انسٹاگرام پر ایک ننھی شامی بچی کی تصویر شیئر کی اور لکھا یہ پھول سی معصوم بچی اتنی ڈری ہوئی ہے کہ کیمرے کے سامنےہاتھ کھڑے کرکے سرنڈر کررہی ہے، بچی کے چہرے پر ڈر صاف نظر آرہا ہے، اس پھول سی معصوم بچی کودیکھ کر میرا دل ٹوٹ گیا۔ میں شام میں ہونے والے تنازعہ اور ظلم وبربریت کو کئی سالوں سے دیکھ رہی ہوں،لیکن اب وقت آگیا ہے کچھ کرنے کا لہٰذا اب میں نے ان مظلوم شامی مہاجرین کی مدد کا فیصلہ کرلیا ہے ۔ میرے پیارے خواتین و حضرات اب میں خود وہاں جاؤں گی اور اپنے ہاتھوں سے شامی پناہ گزین بچوں کی مدد کروں گی اورانہیں عطیات و زکوٰت دوں گی۔

اس خبرکوبھی پڑھیں: کانز فلم فیسٹیول میں شرکت کرنےوالے پاکستانی فنکار

ارمینا نے مزید لکھا یہ رمضان کا مقدس اوربابرکت مہینہ ہے لہٰذا ہمیں اس کی شروعات اچھے کام سے کرنی چاہیئے، ارمینا نے تمام لوگوں سے درخواست کرتے ہوئے کہاکہ آپ لوگ بھی اس کار خیر میں میری مدد کریں کیونکہ آپ کی دی ہوئی مدد میرے اور میری ٹیم کے ذریعے وہاں تک پہنچے گی۔ مجھے امید ہےآپ لوگ ان ننھے ،معصوم اور غریب بچوں کی زندگی میں کچھ اچھا کرنے کیلئے اپنی طرف سے جتنا ہوسکے کریں گے۔ مہربانی کرکے جتنا ہوسکے اس پیغام کو آگے پہنچائیں۔ شکریہ۔

[instagram-post url="https://www.instagram.com/p/Bi18TSSnRss/"]

واضح رہے کہ ارمینا خان اس سے قبل بھی شامی مہاجرین کیلئے آواز اٹھا چکی ہیں،اورشامی پناہ گزین کی مدد کیلئے ہیومن ریلیف فاؤنڈیشن کے ساتھ مل کر عطیات جمع کرچکی ہیں۔

یاد رہے کہ ارمینا خان بین الاقوامی پلیٹ فارم پر پاکستان کی نمائندگی کرنے والی پہلی پاکستانی اداکارہ ہیں جنہوں نے 2013 اور 2014 میں ماہرہ خان سے قبل انٹرنیشنل فلم فیسٹیول کانز میں شرکت کی تھی اور پاکستان کا نام روشن کیا تھا۔