گوبر سے 25 کروڑ کیوبک میٹر گیس حاصل ہوسکتی ہے سائنسدان

توانائی بحران پر قابو، تیل کا درآمدی بل کم کرکے معیشت پر بوجھ کم کیا جاسکتا ہے، ڈاکٹر بشیر. فوٹو: رائٹرز/ فائل

---

نامور زرعی سائنسدان اور ڈائریکٹر جنرل زراعت (فیلڈ) پنجاب ڈاکٹر محمد بشیر نے کہا ہے کہ جانوروں سے حاصل ہونے والے گوبر کا 50 فیصد حصہ سے بائیو گیس تیار کر کے روزانہ 25 ملین کیوبک میٹر گیس حاصل ہوسکتی ہے۔

اپنے ایک انٹرویو میں انہوں نے کہا کہ اس وقت صوبہ پنجاب میں 34 ملین جانور موجود ہیں جن سے روزانہ 5 لاکھ ٹن گوبر حاصل ہوتا ہے۔ اگر جانوروں سے حاصل ہونے والے گوبر کا 50 فیصد حصہ بھی بائیو گیس کی تیاری کیلیے استعمال کیا جائے تو 75 ملین لوگوں کی کھانا پکانے کی ضروریات کو پورا کیا جاسکتا ہے جبکہ بائیو گیس کو زرعی ٹیوب ویل چلانے کیلیے بھی استعمال کیا جا سکتا ہے۔



انہوں نے کہا کہ ملک میں بائیو فیول کی ٹیکنالوجی پر بہت کم کام ہو رہا ہے اور ملک میں نہ تو بائیو فیول کی انڈسٹری موجود ہے اور نہ ہی اس شعبے میں تحقیق پر توجہ دی جا رہی ہے۔ ایک سوال کے جواب میں ڈاکٹر محمد بشیر کا کہنا تھا کہ شعبے کی ترقی کیلیے اقدامات کر کے توانائی بحران پر قابو یا جا سکتا ہے جبکہ بائیو ڈیزل سے تیل کے درآمدی بل میں کمی کے ذریعے ملکی معیشت کے بوجھ کو بھی کم کیا جاسکتا ہے۔