تارکین وطن کے ووٹ ڈالنے کے طریقہ کار سے متعلق الیکشن کمیشن کا اجلاس بے نتیجہ ختم

سمندرپارپاکستانیوں کے ووٹ ڈالنے کے طریقہ کارکا جائزہ لینے کے لئے الیکشن کمیشن کا اجلاس کسی نتیجے پر پہنچے بغیرختم ہوگیا۔


الیکشن کمیشن کا اجلاس سیکریٹری الیکشن کمیشن اشتیاق احمد کے زیرصدارت اسلام آباد میں ہوا، اجلاس میں چیئرمین نادرا نے ووٹنگ کے طریقہ کارپر بریفنگ دی تاہم کمیشن سمندر پارپاکستانیوں کے ووٹ ڈالنے کا طریقہ کار طے کرنے سے متعلق کسی نتیجے پر نہیں پہنچ سکا۔

اجلاس کے بعد میڈیا سے گفتگوکرتے ہوئےنگراں وفاقی وزیرقانون احمربلال صوفی نے کہا بیرون ملک مقیم پاکستانیوں کو ووٹ کی سہولت متعلقہ ممالک کی اجازت سے مشروط ہوگی، چیئرمین نادرا کی بریفنگ کی روشنی میں قانون میں کچھ نکات کی تبدیلی کی ضرورت ہے، نگراں وزیرانفارمیشن ٹیکنالوجی ثانیہ نشترنے کہا کہ سمندرپارپاکستانیوں کے ووٹ ڈالنے کے حوالے سے کل ہونے والے اجلاس میں طریقہ کار طے کرلیا جائے گا ۔