محمودآبادکرایے کے تنازع پر2گروپوں میں مسلح تصادم

منگھوپیرمیں میڈیکل اسٹوراوراورنگی میں نامعلوم ملزمان کی فائرنگ سے 2افرادزخمی

---

محمود آباد نمبر4 میں دوگروپوں کے درمیان جھگڑے کے بعد مسلح تصادم ہوا،اس دوران دونوں جانب سے ایک دوسرے پرآزادانہ فائرنگ کی گئی جس کے نتیجے میں 28 سالہ جاوید خان ٹانگ پرگولی لگنے سے زخمی ہوگیا،فائرنگ سے موقع پرموجود افراد میں بھگدڑمچ گئی اور خوف و ہراس پھیل گیا۔

واقعے کی اطلاع ملتے ہی پولیس کی بھاری نفری نے موقع پرپہنچ کر صورتحال کوکنٹرول کرلیا تاہم رات گئے تک علاقے میں بدستورکشیدگی پھیلی ہوئی تھی،بلوچ کالونی تھانے ایس ایچ او اسحاق لاشاری نے بتایا کہ رکشے کے کرایے پر دو افراد میں تلخ کلامی شروع ہوئی تھی جس نے بعدازاں مسلح تصادم کی شکل اختیارکرلی،منگھوپیر کے علاقے گرم چشمہ کے قریب میڈیکل اسٹور پر نامعلوم ملزمان کی فائرنگ سے 32 سالہ عبدالحکیم ٹانگ پر گولیاں لگنے سے زخمی ہوگیا۔

اورنگی ٹاؤن کے علاقے الطاف نگرمیں نامعلوم ملزمان کی فائرنگ سے 22 سالہ عارف زخمی ہوگیا،سلطانہ آباد ہجرت کالونی میں رہائش پذیر 10 سالہ حسن کھیلتے ہوئے نالے میں گرگیا جس کی اطلاع پر اہل محلہ نے اپنی مدد آپ کے تحت بچے کی تلاش شروع کردی تاہم رات گئے تک بچے کا پتہ نہیں چل سکا۔