سلمان خان کے قتل کا منصوبہ بنانے والا ملزم گرفتار

ملزم نے منصوبہ بندی کے تحت سلمان کے گھر کی ریکی کی اور وہاں کچھ تصاویر بھی بنائیں، پولیس (فوٹو: فائل)

---

بالی ووڈ سلطان سلمان خان کے قتل کا منصوبہ بنانے والے ملزم کو پولیس نے گرفتار کرلیا۔

بھارتی میڈیا رپورٹس کے مطابق ہریانہ پولیس نے ملزم کی گرفتاری کی تصدیق کرتے ہوئے کہا کہ 28 سالہ سمپت نہرا کا تعلق راجستھان کے بشنوئی قبیلے کے بااثر اور جرائم پیشہ شخص لارینس بشنوئی کے گینگ سے ہے جو سلمان خان کے قتل کی منصوبہ بندی کے تحت ریکی کے لیے ممبئی گیا تھا اور اُس نے اداکار کے گھر کی کچھ تصاویر اور اُن کے گھر آنے اور جانے والے تمام راستوں کی اپنے موبائل سے فوٹیج بھی بنائی تھیں۔

Haryana STF arrested Lawrence Bishnoi gang's contract killer Sampat Nehra from Hyderabad. Police say 'Bishnoi had threatened to kill Salman Khan in connection with blackbuck case. Nehra had gone to recce his residence in Mumbai&planned to flee outside India after executing plan'. pic.twitter.com/DttshYfoZR

— ANI (@ANI) June 9, 2018

ڈی آئی جی ہریانہ ستیش بالن نے مزید انکشاف کیا کہ نہرا نے ممبئی آکر نہ صرف اُن کے گھر کا دورہ کیا بلکہ مداحوں سے ملنے کے لیے سلمان کے بالکونی میں آنے کا وقت بھی نوٹ کیا اور یہاں تک کہ اُس نے سلمان کے گھر کے قریب ترین مقام تک پہنچنے اور وہاں سے بالکونی کا فاصلہ بھی نوٹ کیا تاکہ اس جگہ سے سلمان کو نشانہ بنایا جاسکے۔



پولیس نے مزید بتایا کہ رواں برس جنوری میں راجستھان کے بشنوئی قبیلے کے بااثر افراد نے نایاب کالے ہرن کا شکار کرنے کے معاملے پر سلمان خان کو قتل کرنے کی دھمکی دی تھی۔

واضح رہے کہ بالی ووڈ کے سلطان سلمان خان کو نایاب کالے ہرن شکار کے 19 سال پرانے کیس میں بھارتی ریاست راجستھان کے شہر جودھ پور کی مقامی عدالت نے چند ماہ قبل قصوروار ٹھہراتے ہوئے 5 سال قید اور 10 ہزار روپے جرمانے کی سزاسنائی تھی جس کے بعد انہیں ضمانت پر رہا کردیا گیا تھا۔